Azərbaycan elminə ağır itki üz verib. Azərbaycan Milli Elmlər Akademiyasından APA-ya verilən xəbərə görə, tanınmış alim, Azərbaycan Respublikasının Dövlət Mükafatı laureatı, Coğrafiya İnstitutunun elmi işlər üzrə direktor müavini, AMEA-nın müxbir üzvü Elbrus Əlizadə dekabrın 29-da 59 yaşında vəfat edib.
Elbrus Əlizadə 4 mart 1957-ci ildə Ağdaş rayonunun Aralbir kəndində anadan olub. Bakı Dövlət Univeristetinin coğrafiya fakültəsini bitirib.
Azərbaycanın dağlıq ərazilərinin morfostruktur quruluşunun kosmik materialların deşifrlənmə materiallarının tətbiqi ilə tədqiqi, kosmik şəkillərin struktur-geomorfoloji deşifrlənmə metodlarının işlənilməsi, geomorfoloji risk və təhlükələrin qiymətləndirilməsi, geodinamiki-gərgin ərazilərin öyrənilməsi, Böyük və Kiçik Qafqaz dağları, geosistemlərinin ekogeomorfoloji tədqiqi, ekogeokomplekslərinin formalaşmasına kompleks endo-ekzodinamiki amillərin təsir dərəcələrinin müəyyən edilməsi mərhum alimin elmi-tədqiqat sahələrinə daxildir.
160-dan artıq elmi və elmi-pedaqoji əsərin, o cümlədən 2 monoqrafiya, 1 kitab, 115 məqalə, 2 dərslik, 3 dərs vəsaiti, bir necə xəritə və 40-a yaxın elmi-metodiki vəsatin müəllifidir.
Allah rəhmət eləsin.