Super yapışqanın təsadüfən nəfəs yollarına düşməsi 40 yaşlı kişinin ağciyərində nadir patologiyaya səbəb ola bilər. Qeyri-adi törəmə ən azı 9 il ərzində yox olmayıb, lakin bu müddətdə ciddi fəsadlara yol açmayıb.
Ucnoqta.az xəbər verir ki, Belçikada həkimlər təsadüfən super yapışqan nəfəs almış 40 yaşlı kişinin ağciyərində qeyri-adi törəmə aşkarlayıblar. İlkin müayinələr zamanı xərçəng ehtimalı nəzərdən keçirilsə də, sonrakı araşdırmalar problemin tamamilə fərqli səbəbdən yarana biləcəyini üzə çıxarıb.
Kişi əvvəlcə ağciyərlərində hər hansı problem olduğundan xəbərsiz olub. O, xəstəxanaya qarın nahiyəsində kəskin ağrı şikayəti ilə müraciət edib. Müayinə zamanı böyrək daşları aşkarlansa da, rentgen görüntülərində həkimlər ağciyərdə əlavə anomaliya – düyün şəklində törəmə müşahidə ediblər.
Kişinin heç vaxt siqaret çəkməməsinə baxmayaraq, həkimlər onkoloji xəstəlik ehtimalını istisna etməyiblər. Lakin əlavə müayinələr bu şübhələri aradan qaldırıb. Məlum olub ki, söhbət bədxassəli şişdən deyil, pnevmatoseldən gedir. Bu, daxilində qaz toplanan, nazik divarlı boşluqdur.
Bu diaqnoz həkimləri təəccübləndirib. Çünki belə dəyişikliklər əsasən körpələrdə müşahidə olunur. Yetkin insanlarda isə infeksiyalar və ya ağciyər zədələnmələri nəticəsində yarana bilər. Lakin xəstənin tibbi tarixçəsində bu halların heç biri qeydə alınmayıb.
Mümkün səbəb kişi ilə söhbətdən sonra üzə çıxıb. O bildirib ki, həkimə müraciət etməzdən bir müddət əvvəl təsadüfən super yapışqan nəfəs alıb. Mütəxəssislər yapışqanın tənəffüs yollarına düşməsinin pnevmatoselin yaranmasına səbəb ola biləcəyini ehtimal ediblər.
Bununla belə, həkimlər bu əlaqəni qəti şəkildə sübut edə bilməyiblər. Digər mümkün səbəbləri istisna etmək üçün ağciyər toxumasından biopsiya götürülməsi tələb olunardı.
Qeyri-adi diaqnoza baxmayaraq, həkimlər aktiv müalicəyə ehtiyac görməyiblər. Onlar törəmənin təhlükə yaratmadığına əmin olmaq üçün xəstəni vaxtaşırı müayinədən keçirməyi qərara alıblar.
Hadisənin diqqətçəkən məqamlarından biri də pnevmatoselin adətən öz-özünə yox olmasıdır. Lakin belçikalı kişinin ağciyərindəki boşluq ən azı 9 il ərzində qalıb və bu müddətdə nəzərəçarpan fəsad törətməyib.
Məqalə müəlliflərinin fikrincə, bu nadir hadisə yapışqanın tənəffüs yollarına düşməsinin yetkin insanlarda pnevmatoselin mümkün səbəblərindən biri ola biləcəyini göstərir. Onlar həmçinin belə hallarda xəstənin müntəzəm müşahidə altında saxlanılmasının mümkün olduğunu vurğulayıblar.