Oktyabrın 4-də axşam saatlarında Liviyanın paytaxtı Tripoli və ətraf ərazilərin səmasında parlaq meteor müşahidə olunub.
Ucnoqta.az xəbər verir ki, bu barədə Liviya Uzaqdan Zondlama və Kosmik Elmlər Mərkəzi (LCRSSS) məlumat yayıb.
Məlumata görə, meteoroid və ya kometa parçası kimi kiçik göy cismi çox yüksək sürətlə Yer atmosferinə daxil ola bilər. Hava ilə sürtünmə nəticəsində cisim qızaraq yanır və parlaq işıq, eləcə də işıqlı iz yaradır. LCRSSS-in məlumatına görə, internetdə yayılan videolarda da məhz belə bir hadisə qeydə alınıb.
Mərkəz əlavə edib ki, bəzi hallarda bu cür hadisələr kosmik tullantıların, o cümlədən peyk və ya köhnə raket hissələrinin atmosferə daxil olaraq yanması nəticəsində də baş verə bilər.
“Libya Observer” qəzetinin məlumatına görə, Tripoli və ətraf ərazilərin sakinləri göydə parlaq obyekt gördüklərini bildiriblər. Obyektin görünməsi göy gurultusunu xatırladan güclü səslə müşayiət olunub.