ABŞ Prezidenti Donald Tramp Microsoft-un təsisçisi Bill Geytsin süni intellektlə bağlı mövqeyini dəyişdiyini bildirib.
Ucnoqta.az xəbər verir ki, Tramp bu barədə sentyabrın 29-da Ağ Evdə jurnalistlərin suallarını cavablandırarkən danışıb.
Jurnalistlərdən biri Geytsin süni intellektin bəşəriyyət üçün fəlakətli nəticələrə səbəb ola biləcəyi barədə açıqlamalarını Trampın diqqətinə çatdırıb.
“İndi o, artıq bunu demir”, – Tramp cavab verib.
ABŞ prezidenti Geytsin əvvəlki açıqlamalarının əksinə danışdığını iddia edib: “Əslində o, tamamilə əksini söylədi. Biz buna müsbət tərəfdən baxırıq. Bundan əlavə, deyirlər ki, bu, hətta Sənaye İnqilabını da geridə qoyan ən böyük sahə ola bilər”.
Qeyd edək ki, Geyts sentyabrın 27-də NBC telekanalının “Meet the Press” proqramında süni intellektin müəyyən şəraitdə 1 milyard insanın ölümünə səbəb ola biləcək hadisələrə gətirib çıxara biləcəyini demişdi. O, xüsusilə texnologiyanın pis niyyətli insanlar tərəfindən istifadəsi ilə bağlı narahatlığını ifadə etmişdi.