Liviyanın Tripolidən cənub-qərbdə yerləşən ən böyük neft yataqlarından biri olan Əş-Şərarədə hasilat kəskin azalıb.
Ucnoqta.az xəbər verir ki, bu barədə “Reuters” yataqda çalışan iki mühəndisə istinadən məlumat yayıb.
Məlumata görə, yataqda gündəlik neft hasilatı təxminən 200 min barel azalaraq 100-105 min barelə düşüb. Liviyanın “Al Wasat” portalının məlumatına əsasən, yatağın gündəlik hasilat gücü təxminən 300 min bareldir.
Hasilatın azalmasının səbəbləri açıqlanmayıb. Lakin son illərdə yataqda hasilatın azalmasına etiraz aksiyaları, siyasi fikir ayrılıqları, eləcə də təxribatların yaratdığı texniki problemlər səbəb olub.
Qeyd edək ki, ötən həftə Liviyanın Milli Neft Korporasiyası (NOC) ölkənin şimal-qərbində yerləşən Ət-Təhara və Əl-Həmada yataqlarında hasilatın dayandırılması ilə əlaqədar fors-major elan edə biləcəyini açıqlamışdı.
Buna səbəb əsas neft kəmərindəki siyirtmənin qanunsuz şəkildə bağlanması olub. Sonradan həmin yataqlarda neft hasilatı bərpa edilib.