ABŞ-ın Nyu-Cersi ştatında çimərlikdə 30-a yaxın ölü köpəkbalığı aşkarlanıb. Hadisənin səbəbi hələlik məlum deyil.
Ucnoqta.az xəbər verir ki, “ABC News”un məlumatına görə, ölü köpəkbalıqlarını avqustun 12-də səhər saatlarında yerli sakin Mişel Qrinlinq aşkarlayıb. Onlar təxminən 10 kvartal uzunluğunda ərazidə sahilə çıxıb.
Stokton Universitetinin dəniz bioloqu Stiven Naqieviç bildirib ki, köpəkbalıqları adətən yüzlərlə, hətta minlərlə fərddən ibarət dəstələr halında hərəkət edir. Bu növ Nyu-Cersidə kifayət qədər geniş yayılıb.
Mütəxəssis hadisənin mümkün səbəbləri arasında suyun çirklənməsi və brakonyerliyi göstərib. Onun sözlərinə görə, köpəkbalıqları təsadüfən torlara düşə və daha sonra dənizə atıla bilər.
Ştatın Balıqçılıq və Vəhşi Təbiət Departamentindən bildirilib ki, yay aylarında köpəkbalıqlarının sahilə yaxın ərazilərdə qidalanmasına tez-tez rast gəlinir. Araşdırma davam edir.