Avropada baş verən tam Günəş tutulması zamanı elektrik enerjisinin verilişində ciddi problem və kütləvi elektrik kəsintisi qeydə alınmayıb.
Ucnoqta.az bildirir ki, bu barədə Avropa Elektrik Ötürücü Sistem Operatorları Şəbəkəsinin (ENTSO-E) eksperti məlumat verib.
ENTSO-E bildirib ki, tutulmanın 99,99 faizə çatdığı İtaliya, İspaniya və Portuqaliya da daxil olmaqla, Avropa İttifaqı ölkələrində enerji təchizatı sabit qalıb.
Daha əvvəl təşkilat Günəş enerjisi istehsalının azalması səbəbindən Avropanın enerji sisteminin 9,7 QVt-a qədər enerji çatışmazlığı ilə üzləşə biləcəyi barədə xəbərdarlıq etmişdi. Bu səbəbdən Avropa Komissiyası və enerji operatorları mümkün çatışmazlığı kompensasiya etmək üçün əvvəlcədən hazırlıq işləri aparmışdı.
Ekspertlərin fikrincə, tutulmanın enerji sistemi üçün əlverişli vaxtda baş verməsi də mühüm rol oynayıb. Hadisə iş gününün sonunda, gündüz elektrik tələbatının azaldığı, lakin axşam işıqlandırma tələbatının hələ yüksəlmədiyi vaxtda baş verib. Havanın nisbətən sərin olması kondisionerlərdən istifadənin azalmasına, küləyin kifayət qədər olması isə külək enerjisi istehsalının sabit qalmasına şərait yaradıb.
Belçikada isə Günəş tutulması böyük maraq doğurub. On minlərlə insan şəhərlərin küçə və meydanlarına çıxaraq hadisəni izləyib. Brüsseldə Ay Günəş diskinin təxminən 90 faizini örtüb, lakin şəhərdə tam qaranlıq yaranmayıb.///tass