Bakıda Binə qəsəbəsini Koroğlu metrostansiyası ilə əlaqələndirən 160 saylı avtobus marşrutunun iştirakı ilə müxtəlif illərdə bir sıra yol-nəqliyyat hadisələri baş verib.
Ucnoqta.az xəbər verir ki, ən ağır hadisələrdən biri 1 oktyabr 2018-ci ildə qeydə alınıb. Binə qəsəbəsində 160 saylı avtobusun qatarla toqquşması nəticəsində 1 nəfər ölüb, yaralıların sayı isə sonrakı məlumatlarda 34 nəfərə çatıb.
Bundan cəmi bir neçə gün sonra – 6 oktyabr 2018-ci ildə 160 saylı avtobus aeroport yolunda minik avtomobili ilə toqquşub. Hadisə nəticəsində avtomobildə olan 1976-cı il təvəllüdlü qadın və onun 6 yaşlı övladı xəsarət alaraq xəstəxanaya yerləşdirilib.
28 dekabr 2018-ci ildə svtobus KIA markalı avtomobillə toqquşub. Xəsarət alan olmayıb.
27 iyun 2022-ci ildə isə Binə qəsəbəsinin “Sovxoz” yaşayış sahəsində karyer daşı ilə yüklənmiş “ZİL” markalı yük avtomobili 160 saylı avtobusa çırpılıb.
25 Oktyabr 2025-ci il avtobus mühərrikində yaranmış nasazlıq səbəbindən Binə qəsəbəsində sərnişin daşıyarkən yanıb.
Son dövrdə də marşrutun iştirakı ilə qəzalar qeydə alınıb. İyulun 24-də 160 saylı xətt üzrə hərəkət edən “Isuzu” markalı avtobusla “Hyundai” markalı avtobus toqquşub. Hadisə nəticəsində 22 nəfər xəstəxanaya yerləşdirilib.
Avqustun 12-də 160 saylı xətt üzrə hərəkət edən “İsuzu Citiport” markalı avtobus idarəetmədən çıxaraq dayanacağa çırpılıb. Hadisə zamanı xəsarət alan olmayıb.
Beləliklə, açıq mənbələrdə 160 saylı avtobusun iştirakı ilə 2018–2026-cı illər ərzində bir neçə qəza faktı barədə məlumat mövcuddur.
Xatırladaq ki, xətt üzrə sərnişindaşıma fəaliyyətini “Ayşən LTD” MMC həyata keçirirdi.
2018-ci ildə Binə qəsəbəsində baş verən ağır qatar qəzasından sonra Bakı Nəqliyyat Agentliyi “Ayşən LTD” MMC ilə müqaviləyə xitam verdi. Xəttin idarə edilməsi rəsmi sərəncamla “Çinar-Trans” MMC-yə həvalə olundu.