İran Omanın Hörmüz boğazında gəmiçiliyin normallaşdırılması ilə bağlı təklif etdiyi planı rədd edib.
Ucnoqta.az xəbər verir ki, Reuters agentliyinin mənbələrə istinadən yaydığı məlumata görə, Oman tərəfindən hazırlanan plan Hörmüz boğazında dəniz yolunun iki ölkə tərəfindən birgə idarə olunmasını və tranzit əməliyyatları üçün gəmi sahiblərindən könüllü ianələrin alınmasını nəzərdə tuturdu.
Bildirilib ki, bu təşəbbüs Fars körfəzi ölkələri tərəfindən dəstəklənib. Təklif olunan model Malakka boğazında tətbiq olunan yanaşmaya əsaslanırdı. Həmin bölgədə İndoneziya, Malayziya və Sinqapur gəmi sahiblərindən könüllü ödənişlər vasitəsilə dəniz yolunun istismar xərclərinin qarşılanmasına nəzarət edir.
Lakin Tehran Hörmüz boğazında bərabər nəzarət mexanizmi ideyasını qəbul etməyib.
Reuters-in məlumatına görə, ABŞ-ın mövqeyi isə Hörmüz boğazından keçid üçün hər hansı rüsum və ya tranzit haqqının tətbiq edilməməsindən ibarətdir. Vaşinqtonun İranla mümkün razılaşma çərçivəsində irəli sürdüyü variantlarda da gəmiçilikdən ödəniş alınması ehtimalı nəzərdə tutulmur.
Hörmüz boğazı dünya enerji təchizatında mühüm əhəmiyyət daşıyan dəniz keçidlərindən biridir və burada yaranan hər hansı gərginlik qlobal neft bazarlarına təsir göstərə bilər.