ABŞ Prezidenti Donald Trampın Çinə qarşıdan gələn səfəri zamanı Tayvan məsələsi müzakirə olunacaq, lakin bu, səfərin əsas mövzusu olmayacaq.
Ucnoqta.az xəbər verir ki, bu barədə ABŞ Dövlət Katibi Marko Rubio Vatikana və İtaliyaya səfərlərindən sonra Romada jurnalistlərə açıqlamasında bildirib.
"Sadəcə olaraq, gələn həftəki səfər və xüsusən də Tayvan kontekstində deyə bilərəm ki, ABŞ-ın siyasəti dəyişməz olaraq qalır. Mövcud vəziyyətdə hər hansı məcburi dəyişikliklər görmək istəmirik, çünki bunun dünya üçün sabitliyi pozacağına inanırıq", – deyə Rubio qeyd edib.
Dövlət Katibinin sözlərinə görə, Vaşinqton Tayvan boğazında sabitliyin qorunmasını bütün dünya üçün vacib hesab edir. "Səfər zamanı bunun müzakirə olunacağını gözləyirəm, amma düşünmürəm ki, bu, diqqət mərkəzində olacaq, baxmayaraq ki, bu, mütləq müzakirə olunan məsələlərdən biri olacaq. Biz inanırıq ki, boğazda sabitlik Çinin, ABŞ-ın və bütün dünyanın maraqlarına uyğundur", – deyə o əlavə edib.