Son zamanlarda sosial şəbəkələrdə ali təhsil müəssisələrinə qəbul ola bilməyən abituriyentlərə qarşı valideyinin basqısı (tənəsi) geniş müzakirə mövzusudur. Bu cür basqılar bəzən təəssüf ki, ağır faciələrə, ailədə qarşıdurmaya və valideyn – övlad münasibətlərinin pozulmasına gətirib çıxarır.
Məsələ sosial problem səviyyəsinə qalxmaqdadır. Qeyd etməliyik ki, problem təkcə abituriyentlərin uğursuz imtahan nəticələrində deyil, eyni zamanda valideynlərin təhsilə və övladlarının gələcəyə baxışındadır. Azərbaycan dövlətinin bugünkü gündə iqtisadi siyasəti əmək bazarında ali təhsillilərin çoxluğu ilə deyil, ehtiyac olunan peşələrə uğurla yiyələnən gənclərə yönəlmişdir.
Peşə təhsili ölkədə prioritet sahələrindən birinə çevrilməkdədir. Ali təhsilli olmaq əvvəlki kimi prestij hesab olunmur. Bu gün istehsalatın tələb etdiyi daha çox gəlir gətirən sahə önə çıxır. Buna görə də ali təhsil müəssisələrinə qəbul olmayan tələbə və onların valideynləri bunu bir faciə kimi qəbul etməsinlər. Övladlarının marağına, bacarığına, psixoloji durumuna uyğun olan peşələrə yönəlməsinə dəstək olsunlar.
Bunun üçün dövlətin iqtisadi siyasətini və istehsalatın tələbini bilmək lazımdır. İşsiz ali təhsilli olmaqdansa, yaxşı qazanc gətirən peşələrə yiyələnmək daha əlverişli olar. Əgər valideynlər təhsil prosesinə və uşaqlarının gələcəyinə bu gözlə baxsalar abituriyentlərə qarşı mövcüd olan ictimai və valideyn basqısı aradan qalxmış olacaq.
Abituriyentlərə tövsiyə edərdik ki, peşə seçərkən və öz gələcəyini müəyyənləşdirərkən ətrafın, qohumların, qonşuların və dost – tanışların təsirinə qapılmasınlar. Məsələyə daha ciddi yanaşıb hədəflərini düzgün şəkildə müəyyənləşdirib öz istədikləri peşəni seçsinlər.
Ali təhsil müəssisələrinə qəbul oluna bilməyən abituriyentlər bilsinlər ki, ali məktəbə qəbul olunmamaq həyatın sonu deyil.
Nuranə Şahin
Azərbaycan Turizm və Menecment Universitetinin psixoloqu