“Ölsə yaşaya bilmərəm“ dediyim anam artıq 41 gündur yoxdur. Ölmədim, onsuz ayaqdayam, həyat öz axarıyla davam edir. Anamı bütün varlığımla sevdim, onun dualarıyla yol getdim. Bütün uğurlarımı onlar ücün qazandım”.
Ucnoqta.az xəbər verir ki, bu sözləri aparıcı Xoşqədəm Hidayətqızı bir müddət əvvəl vəfat edən anası Ofeliya Baxşəliyeva haqqında yazıb.
Aparıcı anasını bu sözlərlə xatırlayıb:
“Oğullarını vaxtsız itirmiş anam mənim uğurlarımı gördükcə fərəhlənirdi, sevinc yaşları axardı gözlərindən… Böyük ürəkli bir qadın idi, sevgi dolu, mərhəmətli, övladlarını dəlicəsinə sevən bir ana. İndi artıq o olmadan yaşayıram, duaları olmadan işə gedirəm, evimdə qonaqlarım olur, amma süfrəmin başında anam yoxdur və olmayacaq. Çox yazmayacağam, sadəcə təşəkkürlərim var. Bu neçı ildə anamın daim yanında olan, xəstəxanalarda, evdə sabahlara qədər yuxu yatmadan qulluğunda dayanan bacılarım, qardaşımın həyat yoldaşına sonsuz təşəkkür edirəm, Allahın nəzəri üzərinizdə olsun. Milli Onkologiya Mərkəzinin rəhbərinə və anamın həkiminə təşəkkür edirəm. Bizimlə birlikdə əziyyət çəkdilər və öz anaları kimi qulluq etdilər. Beş il o ağır xəstəliyə qalib gəldi. Anamın üzərində əziyyəti olan hər kəsə minnətdaram. Allah yaxşı insanları qorusun, daim yüksəklərdə etsin. 40 gün ərzində məni yalnız buraxmayan bütün dostlarıma təşəkkür edirəm, Rəbbim sizlərin xoş günlərində yanınızda olmağı mənə nəsib etsin”.