"Juninyonun transferi Azərbaycan futbolu üçün önəmli hadisə olacaq".
Apasport.az xəbər verir ki, bunu "Qarabağ"ın baş məşqçisi Qurban Qurbanov "Kəpəz"lə keçirilən yoxlama oyunundan sonra jurnalistlərə açıqlamasında deyib.
Təcrübəli çalışdırıcı braziliyalı forvardın keçidi ilə bağlı bunları söyləyib: "Juninyo məsələsi konkretləşməyib. Bəlkə də gedəcəyi konkretləşib, amma klubla bağlı müəyyən nüanslar var. Çünki oyunçunun özünün də istəyi vacibdir. Əvvəl "Sevilya" ilə demək olar ki, razılıq əldə edilmişdi. Daha sonra "Flamenqo" variantı ortaya çıxdı. Belə klublardan bizə təklif gəlməsi "Qarabağ"ın böyüməsi deməkdir. İstər İspaniya, istərsə də Braziliya mətbuatı "Qarabağ"dan yazmağa başladı. Bu işdə futbolçunun özünün də istəyi önəmlidir. Hər şey yaxın günlərdə dəqiqləşəcək".
Qeyd edək ki, "Qarabağ" "Kəpəz"i 5:1 hesabı ilə məğlub edib.