Ağrı ilə üzləşdiyimiz zaman apteklərdən ən çox aldığımız dərmanın “Nimesil” olduğunu desək, yəqin ki, yanılmarıq. Azərbaycanda da populyarlıq qazanan bu dərmana həddindən artıq təlabat var.
Maraqlıdır ki, son dövrlərdə bu dərman vasitəsinin zərərləri də müzakirə olunur. Əslində, dərman kimi qəbul edilən “Nimesil”in bir sıra fəsadlara yol açdığı bildirilir.
“Qafqazinfo” məsələnin vacibliyini nəzərə alaraq, dünya ölkələrinin və bir sıra səhiyyə təşkilatlarının bu dərman haqda qəbul etdiyi qərarları dərc edir.
Məsələn, Beynəlxalq Dərman Bülletenləri Cəmiyyətinin (ISDB) bəyanatında bildirilir ki, “Nimesil” və onun bütün növləri qaraciyərə vurduğu ciddi zərərə görə bütün dünyada ləğv edilməlidir.
Məlumata görə, “Nimesulide” tərkibli dərman vasitələri xəstələri ölümcül qaraciyər fəsadları ilə üz-üzə qoyur:
“Avropa İttifaqı rəsmiləri istehlakçıları qoruya bilmir. “Nimesulid”in Avropa və dünyanın bəzi digər bazarlarında qalmasına icazə verilməsini qəbuledilməz hesab edirik. Bu preparat heç bir terapevtik üstünlük və ya daha yaxşı mədə-bağırsaq fəaliyyəti təmin etmir, digər tərəfdən isə qaraciyər pozğunluqları riskini artırır”.
Qeyd edək ki, sözügedən dərman vasitəsi təhlükəsizlik məsələləri ilə bağlı narahatlıqlar doğurduğu üçün ABŞ, Böyük Britaniya, Kanada, Avstraliya, Yeni Zelandiya, Yaponiya kimi ölkələrdə istifadəyə yararsız hesab olunur.
Ağrıkəsicinin qaraciyərdə yol aça biləcəyi risklər Avropa Dərman Agentliyi tərəfindən də təsdiqlənib.
Finlandiya, İspaniya, İrlandiya və Sinqapur qaraciyərin ciddi zədələnməsi ilə bağlı xəbərlərdən sonra nimesulid tərkibli dərmanları bazardan çıxarbılar.
Əlavə edək ki, Azərbaycanda da kifayət qədər məşhurluq qazanan qeyri-steroid iltihab əleyhinə preparat Almaniya istehsalıdır.
Onun tərkibi nimesulid adlı maddə ilə zəngindir ki, bu da artrit kimi xroniki xəstəliklər üçün də tövsiyə edilmir.
Ağrıkəsici qadınlar üçün də laktasiya və hamiləlik dövründə əks göstəriş hesab olunur.
Bu isə qaraciyər çatışmazlığı da daxil olmaqla, qaraciyər toksikiliyinin artması riski ilə bağlıdır.
Yanvarın 3-ü Hindistan Baytarlıq Tədqiqat İnstitutunun (IVRI) alimləri tərəfindən aparılan araşdırmaların nəticələrinə görə, nimesulid tərkibli vasitələr heyvanlarda da uzun müddət tətbiq olunarsa, onların tələfatına yol açır.
Elmi araşdırmalar bu dərmanın nəsli kəsilməkdə olan qarğalara zəhərli təsir göstərdiyini təsdiqlədikdən sonra Hindistan məşhur ağrıkəsicini qadağan edib. Tədqiqatlara görə, o, həm də insanlar üçün uyğun deyil.