Bu gün Bakı Hərbi Məhkəməsində sabiq deputat Hüseyn Abdullayev, onun anası Zeynəb Abdullayeva, Həbib İbrahimov, Xalid Əliyev, Namiq Babayev, İntiqam Süleymanov, Pərviz Kazımov, Zaur Quliyev və Nazim Əliyevin cinayət işi üzrə məhkəmə iclası davam etdirilib.
Hakim Həbib Həsənovun sədrliyi ilə keçirilən prosesdə şahid qismində Canbulat Kalyayev dindirilib.
O qeyd edib ki, H.Abdullayevin şirkətində ofis meneceri kimi fəaliyyət göstərib.
C.Kalyayev söyləyib ki, həmin ofisdə hər hansı qanunsuzluqların şahidi olmayıb, 1000 manat məvacib alıb: "Ofisdə işlərə, əsasən, Hüseyn Abdullayevin anası Zeynəb xanım nəzarət edirdi".
Daha sonra digər zərərçəkmiş Rəsmiyyə Abdullayeva ifadə verib. Səhmdar olduğunu vurğulayan zərərçəkmiş təqsirləndirilən H.Abdullayevdən şikayətçi olmadığını deyib: "Səhmdar kimi şirkətdə 170 səhmim olub və heç bir problem olmadan mənfəət götürmüşəm".
Məhkəmənin növbəti iclası aprelin 23-nə təyin edilib.
Qeyd edək ki, rəsmi məlumata görə, ayrı-ayrı vətəndaşların Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə daxil olmuş müraciətləri əsasında 14 fevral 2018-ci il tarixdə başlanmış cinayət işi üzrə H.Abdullayevin 2006-cı ildən 2018-ci ilədək olan müddət ərzində faktiki nəzarət etdiyi “Araz-İnşaat” ASC-də onun tapşırığına əsasən, müəssisənin idarə olunmasını həyata keçirən Babayev Namiq İsmixan oğlu və qeyriləri ilə qabaqcadan əlbir olan bir qrup şəxs halında Cəmiyyətə məxsus obyektləri müxtəlif vaxtlarda ayrı-ayrı şirkətlərə icarəyə verərək, ümumilikdə, 1 milyon 374 min manat məbləğində gəlirlərin Cəmiyyətin kommunal xidmət və sair xərclərinin ödənilməsinə sərf olunmasına dair digər səhmdarlara yalan məlumat verməklə 13 min 373 manat məbləğində dividentləri vahid qəsdlə ələ keçirib zərərçəkmiş şəxslərə xeyli miqdarda maddi ziyan vurmaqla dələduzluq etməsinə şübhələr müəyyən edilib.
Təqsirləndirilən şəxslərdən bəziləri Dövlət Sərhəd Xidmətinin əməkdaşlarıdır. Bu səbəbdən cinayət işi Bakı Hərbi Məhkəməsinə göndərilib.
İş üzrə zərərçəkmiş şəxs qismində 28 nəfər tanınır.
Xatırladaq ki, iş üzrə təqsirləndirilən Z.Abdullayeva, H.İbrahimov, Z.Quliyev və P.Kazımov barəsində ev dustaqlığı qətimkan tədbiri seçilib./report