Paytaxtın “Abad məhəllə”lərində idman yarışları başa çatıb

Ölkə başçısı cənab İlham Əliyevin tapşırıqlarına əsasən paytaxt Bakı şəhərinin qəsəbə və yaşayış sahələrində salınan «Abad məhəllə»lərdə sakinlərin və xüsusilə yeniyetmə gənclərin asudə vaxtlarının səmərəli təşkili, onların sağlam həyat tərzi sürməsi və idmanla yaxından məşğul olması üçün hər cür şərait yaradılıb. Bu istiqamətdəki işləri daha da genişlənirmək məqsədi ilə Bakı Şəhər Gənclər və İdman Baş İdarəsi tərəfindən  dekabr ayının əvvəlindən «Abad məhəllə» layihəsi çərçivəsində paytaxt rayonlarının ərazilərində yeni yaradılmış abad həyətlərdə məhəllələrarası futbol və şahmat yarışlarının təşkili və keçirilməsinə start verilib.

Bakı Şəhər İcra Hakimiyyətinin Mətbuat Xidmətindən Ucnoqta.az-a verilən məlumata görə, iki mərhələdən ibarət olan mini furbol turnirində 1300-ə yaxın 2004-2006-cı il təvəllüdlü oğlanlardan ibarət 100-dən artıq komanda mübarizə aparmış, final mərhələsinə hər rayondan bir qalib komanda olmaqla 11 komanda vəsiqə qazanıb.

Final mərhələsi Yasamal rayonu, Məmməd Rahim küçəsi 20-də yerləşən ABAD məhəllənin mini-futbol meydançasında keçirilmişdir. Olimpiya sistemi üzrə olduqca maraqlı və gərgin mübarizə şəraitində keçən turnirin yekun nəticələrinə əsasən I yerə Keşlə (Nizami rayonu), II yerə Sabunçu (Sabunçu rayonu), III yerə isə Lökbatan (Qaradağ rayonu) komandası layiq görülmüş, qalıblər Baş İdarə tərəfindən müvafiq dərəcəli diplom, medallar və kuboklarla təltif olunublar.

Şahmat turnirdə isə 200-ə yaxın 2006-2008-ci il təvəllüdlü oğlan və qızlar iştirak etmişlər. Nəsimi ryonunda keçirilən paytaxt final mərhələsinə vəsiqə qazanmış 22 nəfərin iştirak etdiyi yarış olimpiya sistemi üzrə maraqlı və gərgin mübarizə şəraitində keçmiş, onların yekununa əsasən  qızlar arasında I yerə Xumar Məhərrəmova (Sabunçu rayonu), II yerə Nüşabə Novruzlu (Yasamal rayonu), III yerə Aynur Hüseynova (Qaradağ rayonu), oğlanlar arasında I yerə  Ziya Məhəmmədov (Binəqədi rayonu), II yerə Rəvan Uğuzov (Nərimanov rayonu) və III yerə Məhəmməd Həsənzadə (Xəzər rayonu) layiq görülüblər.

Qalib və mükafatçılar Baş İdarənin müvafiq dərəcəli diplom və medalları, həmçinin qiymətli hədiyyələrlə təltif olunublar.

“ABAD məhəllə”   yarışmasının oyunları sakinlər tərəfindən maraqla izlənmiş və rəğbətlə qarşılanıb.