Quba rayonunda doğuş zamanı körpə ölümü baş verib.
Ucnoqta.az "Report"a istinadən xəbər verir ki, Quba şəhər sakini, 1994-cü il təvəllüdlü Turac Nəzər qızı Sultanova Quba Rayon Mərkəzi Xəstəxanasının Doğum şöbəsinə doğuş üçün aparılıb. Lakin ilk hamiləliyindən dünyaya gətirdiyi oğlan körpəsi ölü doğulub.
T. Sultanovanın qayınatası Salman Sultanov açıqlamasında hadisənin həkimlərin səhlənkarlığı ucbatından baş verdiyini bildirib. O, faktın araşdırılması üçün hüquq-mühafizə orqanlarına müraciət edəcəyini də bildirib: "Gəlinim hamiləliyin ən son anlarınadək həkim nəzarətində olub. Heç bir problem olmadığını bildiriblər. Lakin doğuşa gedən gəlinimə 20 dəqiqədən sonra körpənin artıq bətində öldüyünü deyiblər. Nəvəmin ölümünə səbəb həkimlərin səhlənkarlığı olub".
Quba Rayon Mərkəzi Xəstəxanasının baş həkimi Əlyar Sərvərov isə deyib ki, doğuş zamanı döl ölü doğulub: "Bu həkim səhvi deyil, ananın patalogiyası hesab olunur".
Faktla bağlı araşdırma aparılır.