Bakının bəzi küçə və prospektlərində aparılan yol xətlənməsi işləri sürücülər arasında suallar doğurur. Belə ki, bəzi yol hissələrində əvvəlki xətlərin tam silinmədən yeni xətlərin çəkilməsi nəticəsində asfalt üzərində fərqli nişanlanmaların izləri qalır.
Ucnoqta.az xəbər verir ki, radio aparıcısı, avto və texno blogger Tural Yusifov Bakıda belə hallardan birini əks etdirən görüntüləri sosial şəbəkə hesabında paylaşıb.
Görüntülərdə yolun hərəkət hissəsində həm bütöv, həm də qırıq-qırıq xəttin çəkildiyi görünür. Bu isə sürücülər arasında hansı nişanlanmanın əsas götürülməli olduğu ilə bağlı sual yaradır.
Qeyd edək ki, yol xətlərinin aydın və düzgün tətbiqi hərəkətin təhlükəsizliyi baxımından mühüm əhəmiyyət daşıyır. Xüsusilə intensiv hərəkətin olduğu yollarda eyni istiqamətdə müxtəlif xətlərin görünməsi sürücülərin qərar verməsini çətinləşdirə və çaşqınlıq yarada bilər.
Məsələnin digər tərəfi isə xətlənmə işlərinin niyə təkrar aparılması ilə bağlıdır. Əgər əvvəl çəkilmiş xətt sonradan dəyişdirilməlidirsə, köhnə nişanlanmanın tamamilə silinməməsinin səbəbi də maraq doğurur.
Azərbaycan Yerüstü Nəqliyyat Agentliyi (AYNA) daha əvvəl yol nişanlanmalarında dəyişikliklərin aparıldığını və uyğun olmayan xətlərin xüsusi texnika vasitəsilə silindiyini açıqlayıb.
Bu baxımdan, sürücülər arasında belə sual yaranır: yol xətləri hansı hallarda yenidən çəkilir və əvvəlki xətt tam silinmədən yeni nişanlanmanın tətbiq edilməsinə nə səbəb olur?
Eyni zamanda, xətlənmə işlərinin təkrar aparılması görülən işlərin səmərəliliyi və ayrılan vəsaitlərin istifadəsi ilə bağlı da suallar yaradır. Belə hallarda yenidən xətlənmənin səbəblərinin və işlərə nəzarət mexanizminin açıqlanması ictimaiyyət üçün maraqlı ola bilər.
Qeyd: Məsələ ilə bağlı AYNA-nın sözügedən xətlənmənin hansı səbəbdən bu formada aparılması və köhnə nişanlanmaların tam silinməməsinin səbəbləri barədə mövqeyini dərc etməyə hazırıq.