Yaponiyanın şərqində yağan güclü və aramsız yağışlar nəticəsində ən azı 4 nəfər ölüb.
Ucnoqta.az xarici mətbuata istinadən xəbər verir ki, təbii fəlakət Çiba bölgəsində ciddi fəsadlara səbəb olub, minlərlə insanın gecə saatlarında Narita hava limanında qalmasına gətirib çıxarıb.
Meteorologiya rəsmiləri yağıntıları “misli görünməmiş” kimi qiymətləndirib. Çiba bölgəsində ilk dəfə ən yüksək, 5-ci səviyyəli güclü yağış xəbərdarlığı verilib. Güclü yağışlar torpaq sürüşməsi təhlükəsini artırıb və elektrik enerjisinin kəsilməsinə səbəb olub.
Məlumata görə, Çiba üzrə təxminən 26 min ev elektrik enerjisiz qalıb.
Tokioya xidmət göstərən əsas hava limanlarından biri olan Naritada isə təxminən 6 min sərnişin gecəni keçirməyə məcbur olub. Hava limanına gedən bir sıra qatar reysləri də cümə günü günortaya qədər ləğv edilib.
Sosial şəbəkələrdə hava limanı əməkdaşlarının sərnişinlərə pulsuz su, qida və yataq kisələri payladığı bildirilib.
Cümə səhərindən etibarən ən yüksək, 5-ci səviyyəli xəbərdarlıqlar 4-cü səviyyəyə endirilib.