UEFA-nın FIFA-nın himayəsi altında keçirilən turnirləri boykot etmək qərarı futbolla deyil, beynəlxalq futbolun idarə olunması və qaydaların tətbiqi ilə bağlıdır.
Ucnoqta.az xəbər verir ki, bu fikri Avropa Şurasının baş katibi Alen Berset “Politico” nəşrinə müsahibəsində səsləndirib.
“Bu, futbol hekayəsi deyil. Bu, qaydalar haqqındadır – onları kimin yazması, necə tətbiq olunması və kimin dəyişdirə bilməsi ilə bağlıdır”, – deyə Berset bildirib.
Onun sözlərinə görə, “futbolun səhmdara deyil, güclü və hamı üçün eyni tətbiq olunan qaydalara ehtiyacı var”.
Berset əlavə edib ki, son Dünya Kuboku futbolun idarə olunması ilə bağlı bir sıra problemləri üzə çıxarıb. O, buna misal olaraq ABŞ prezidenti Donald Trampın FIFA prezidenti Canni İnfantinoya zəngindən sonra ABŞ millisinin hücumçusu Folarin Balogunun diskvalifikasiyasının ləğv edilməsi ilə bağlı iddiaları göstərib.