ABŞ Prezidenti Donald Trampın administrasiyası əvvəlki maliyyə ilində Müdafiə Nazirliyinin büdcəsindən 2 milyard dolları immiqrantlarla mübarizəyə yönəldib və cari maliyyə ilində (ABŞ-da 1 oktyabrda başlayıb) bu məbləği ikiqatdan çox artırmağı planlaşdırır.
Ucnoqta.az xəbər verir ki, bu barədə Konqresin hər iki palatasından bir neçə demokrat tərəfindən cümə axşamı dərc edilmiş birgə hesabatda bildirilib.
Hesabatda qeyd olunur ki, Pentaqonun 2026-cı maliyyə ili üçün büdcə sorğusunda ABŞ-Meksika sərhədində miqrantlara qarşı əməliyyatlar üçün ən azı 5 milyard dollar ayrılıb. Qanunvericilərin sözlərinə görə, Pentaqon ötən maliyyə ilində sərhəddə qoşunların yerləşdirilməsi üçün 1,3 milyard dollar, immiqrantların ölkə daxilində və xaricdə hərbi obyektlərdə saxlanılması üçün 420,9 milyon dollar, Los-Anceles, Portland və Çikaqo kimi ABŞ şəhərlərinə qoşunların yerləşdirilməsi üçün 258 milyon dollar və hərbi deportasiya uçuşları üçün 40,3 milyon dollar ayırıb.