Ukrayna xarici işlər nazirinin birinci müavini Əminə Caparova BMT Baş Assambleyasının iclasında onlara dəstək verən ölkələrə təşəkkür edib.
“Report” xəbər verir ki, bu barədə diplomat “Twitter” səhifəsindən xəbər paylaşıb:
“BMT Baş Assambleyası Ukrayna üçün mühüm olan “Ukraynanın müvəqqəti işğal olunmuş ərazilərindəki vəziyyətə dair” adlı bəndi qüvvədə saxlayaraq Baş Assambleyanın 76-cı sessiyasının gündəliyinə salmaq barədə səs çoxluğu ilə (12 səsə qarşı 71 səslə, 45 bitərəf olmaq şərtilə) qərar verib.
Bu səsvermədə Ukraynaya və beynəlxalq qanunçuluğa dəstək verən bütün ölkələrə minnətdarıq. Müvəqqəti işğal olunmuş torpaqlardakı vəziyyət BMT BA-nın diqqət mərkəzindədir. Rusiyanın əməlləri onların nüfuzunu sarsıtmağa yönəlir və qınağa layiqdir”.
Xatırladaq ki, “Ukraynanın müvəqqəti işğal olunmuş ərazilərindəki vəziyyətə dair” adlı bəndi BMT Baş Assambleyasının 76-cı sesiyasının gündəliyinə salınmasına dair keçirilən səsvermə zamanı Azərbaycan lehinə, Ermənistan isə əleyhinə səs verib.