Kənd Təsərrüfatı Nazirliyinin tabeliyində Aqrar Tədarük və Təchizat (ATT) ASC, Azərbaycan Qida Təhlükəsizliyi Agentliyi (AQTA) və Azərbaycan Arıçılar Assosiasiyasının birgə təşkilatçılığı ilə keçiriləcək arıçılıq məhsullarının 20-ci Respublika Sərgi-Satış Yarmarkasına hazırlıq işləri yekunlaşmaq üzrədir.
Bu barədə Trend-ə ASC-dən bildiriblər və qeyd olunub ki, artıq bütün məhsullar Azərbaycan Qida Təhlükəsizliyi Agentliyi tərəfindən yoxlanılıb. Yarmarka təşkil ediləcək sahədə kameralar quraşdırılıb və mütəmadi olaraq həmin kameralardan insanlar üçün onlayn görüntülər paylaşılacaq.
Xatırladaq ki, ötən il güclü küləyin olduğunu nəzərə alaraq paytaxtda yarmarkanın təşkili üçün xüsusi çadırlar gətirilib. Eyni zamanda, soyuq günlərdə həm arıçılar, həm də alıcıların rahatlığını təmin etmək məqsədilə çadırlarda istilik sistemi quraşdırılacaq.
Qeyd edək ki, 28 sentyabr-18 oktyabr tarixlərdə keçiriləcək yarmarka Fətəli xan Xoyski küçəsi 10 ünvanında (Tofiq Bəhrəmov adına Respublika Stadionunun ərazisi) təşkil olunacaq.