Fransa Prezidenti Emmanuel Makron ölkələri süni intellekt sahəsində müstəqil inkişaf üçün öz infrastrukturunu yaratmağa və açıq mənbəli modellər hazırlamağa çağırıb.
Ucnoqta.az xəbər verir ki, Makron bu barədə BMT Baş Assambleyasının 81-ci sessiyasında çıxışı zamanı bildirib.
Onun sözlərinə görə, süni intellekt sahəsində qərarların yalnız ABŞ, Çin və bir neçə böyük texnologiya şirkətinin əlində cəmləşməsi qəbul edilməməlidir.
Fransa lideri ölkələri bu sahəyə öz regionlarında investisiya yatırmağa və əməkdaşlığı genişləndirməyə çağırıb. O, müstəqilliyinə önəm verən dövlətlərin hesablama imkanlarını və investisiya resurslarını birləşdirərək açıq mənbəli qabaqcıl süni intellekt modeli yarada biləcəyini vurğulayıb.
Makron həmçinin G20 çərçivəsində süni intellekt sahəsində əməkdaşlıq gündəliyinin hazırlanmasını dəstəkləyəcəyini bildirib. Onun sözlərinə görə, bu əməkdaşlıq milli təhlükəsizliklə bağlı həssas sahələrin qorunmasına da xidmət etməlidir.