Rəngli printerlər vasitəsilə saxta pul çap etmə hallarında artım müşahidə edilib.
Bakıda növbəti saxta banknot faktı qeydə alınıb. Bu dəfə paytaxt sakini saxta banknotu bankda dəyişmək qərarına gəlib. Bu barədə Oxu.Az-a Yasamal Rayon Polis İdarəsindən məlumat verilib.
"NBC Bank"ın Yasamal rayon filialında 36 yaşlı F.M. saxta 200-lük avronu dəyişməyə cəhd edib. Amma bankın əməkdaşları saxta banknotu dərhal aşkar edərək kişini saxlayıblar və onu 27-ci Polis Bölməsinə təhsil ediblər.
İlkin dindirmə zamanı F.M. banknotun saxta olduğunu bilmədiyini deyib.
Hazırda saxta banknotları yayan şəxsin axtarışları gedir.
Qeyd edək ki, saxta pul məsələsi bütün ölkələrdə var. Rəqəmsal texnologiyalar isə saxta banknotun keyfiyyətini artırmağa imkan verir. Saxta pul kəsənlər, əsasən, 100, 50 və 20 manatlıqlar çap edirlər.
Son dövrlər isə saxta 5 manatlıqların da olduğu barədə məlumatlar var.
Adətən, printerdə çap edilən saxta banknotu asanlıqla tanımaq mümkündür. Bunun üçün banknota diqqətlə baxmaq kifayət edir. Amma bu yaxınlarda Bakıda banklardan biri saxta pulu aşkar edə bilməyib və bankomat vasitəsilə müştəriyə verib.
Bu isə bazarda kifayət qədər keyfiyyətli saxta pulların dolaşdığından xəbər verir. Belə saxta banknotlar adi printerlə yox, başqa üsulla çap edilir və ölkənin maliyyə sistemi üçün təhlükəlidir.