Ərəb ölkələrinin media təmsilçiləri Cəbrayıl rayonunun Cocuq Mərcanlı kəndinə səfər ediblər.
Ucnoqta.az "Report"a istinadən xəbər verir ki, İslam Ölkələri İnformasiya Agentlikləri İttifaqının nümayəndə heyətini Azərbaycan Prezident Administrasiyasının İctimai-siyasi məsələlər şöbəsinin əməkdaşı Bəhruz Həsənov, Cəbrayıl Rayon İcra Hakimiyyətinin məsul əməkdaşları müşayiət ediblər.
Jurnalistlər əvvəlcə Novruz Aslanov adına Cocuq Mərcanlı kənd orta məktəbində olublar. Kənd haqqında ətraflı məlumat alan xarici media nümayəndələrinə bildirilib ki, Qarabağ müharibəsi dövründə bir neçə ay işğalda qalan Cocuq Mərcanlı 1994-cü ildə ulu öndər Heydər Əliyevin hakimiyyəti dövründə uğurlu Horadiz əməliyyatı zamanı işğaldan azad edilib. 2016-cı ildə, aprel döyüşləri zamanı Lələ Təpə yüksəkliyinin işğaldan azad edilməsi ilə kənd təhlükədən qurtulub. Bundan sonra Prezident İlham Əliyevin sərəncamı ilə Cocuq Mərcanlı yenidən bərpa edilib. 150 ev tikilib, məcburi köçkün həyatı yaşayan ailələr öz doğma kəndlərinə köçürülüb.