Medianın İnkişafı Agentliyi və ADA Universitetinin birgə təşkilatçılığı ilə media nümayəndələri üçün “Rəqəmsal mediada ədəbi dil standartları: müasir yazı texnikası və praktik redaktə” mövzusunda təlimlərə başlanılıb.
Təlimdə çıxış edən Medianın İnkişafı Agentliyinin İcraçı direktorunun müavini, əməkdar jurnalist, yazıçı Natiq Məmmədli qeyd edib ki, qlobal rəqəmsallaşma və sosial şəbəkələrin ekspansiyası media mühitini kökündən dəyişdirib. O bildirib ki, bu gün jurnalistika yalnız informasiya ötürmür, həm də milli ədəbi dili formalaşdırır və qoruyur. Bununla belə, operativlik yarışı, sosial şəbəkə alqoritmlərinin diktə etdiyi bəsit formatlar və süni intellektin kütləvi tətbiqi ədəbi dil normaları üçün ciddi rəqəmsal təhdidlər yaradır.
Natiq Məmmədli vurğulayıb ki, “Rəqəmsal mediada ədəbi dil standartları: müasir yazı texnikası və praktik redaktə” adlı təlim proqramı rəqəmsal çağırışlar fonunda media nümayəndələrinin yazı və redaktə vərdişlərini təkmilləşdirmək, ədəbi dilin saflığını qorumaq və yeni texnologiyalarla effektiv işləmək bacarıqlarını inkişaf etdirməklə müasir Azərbaycan jurnalistikasının rəqəmsal dünyada öz milli-mədəni simasını və keyfiyyət standartlarını qoruması üçün praktiki vərdişlərin mənimsənilməsi məqsədi daşıyır.
30 və 31 iyul tarixlərini əhatə edən təlim proqramı “Müasir dövrdə ədəbi dilin praktik işlənmə səviyyəsi: rəqəmsal təhdidlər və imkanlar”, “Süni intellekt əsaslı məzmun və sosial şəbəkə alqoritimlərinin ədəbi dilə təsiri”, “Ədəbi dilin qorunmasında medianın öhdəlikləri” mövzularını, eləcə də eləcə də nəzəri biliklərin möhkəmləndirilməsinə həsr olunan vörkşopu əhatə edir.