Koronar arteriyalarda kalsium çöküntülərinin olmaması təkcə ürək-damar xəstəlikləri riskini deyil, həm də hər hansı bir səbəbdən vaxtından əvvəl ölüm ehtimalını azaldır. Alimlər gözlənilməz uzunömürlülük əlaməti aşkar ediblər.
Ucnoqta.az xəbər verir ki, ABŞ-nin Solt Leyk Siti şəhərindəki “Intermountain Health” şirkətinin mütəxəssisləri ürək-damar problemləri riski artan 40.000 xəstə haqqında məlumatları təhlil ediblər. Bütün iştirakçılar gizli iltihabı, patologiyaları və şişləri aşkar edə bilən müasir prosedur olan PET/KT stress testindən keçiblər. Bu barədə Gazeta.Ru Amerika Ürək Assosiasiyasının (AHA) konfransında təqdim olunan məlumatlara istinadən məlumat verib.
Nəticələr göstərib ki, arteriyalarında kalsium çöküntüsü olmayan təxminən 8000 insanın damar kalsifikasiyası olanlara nisbətən erkən ölüm riski iki-üç dəfə aşağıdır. Tədqiqat həmçinin müəyyən edib ki, kalsium çöküntüsü olan insanlar arasında ölümlərin yalnız dörddə biri ürək-damar xəstəlikləri ilə əlaqəlidir. Qalan ölümlər hələ də naməlum səbəblərdən baş verib.
AHA-da təqdim olunan məlumatlar erkən diaqnoz və vaxtından əvvəl ölümün qarşısının alınması yanaşmalarına təsir göstərə bilər.