Argentinada "Colgate Total Clean Mint" diş məcununun satışı qadağan edilib. Bu barədə Argentinanın milli dərman vasitələri, qida məhsulları və tibbi texnologiyaların keyfiyyətinə nəzarət idarəsi (ANMAT) məlumat yayıb.
Qurum qadağanı "Colgate"dən istifadə etdikdən sonra ağızın qıcıqlanması ilə bağlı istehlakçıların artan şikayətləri ilə izah edib.
Qeyd edək ki, Braziliyada hələ may ayında "Colgate Total Clean Mint" diş məcununun satışına qadağa qoyulub.
Azərbaycanda da oxşar şikayətlərin olub-olmaması maraq doğurur.
Modern.az məsələ ilə əlaqədar Səhiyyə Nazirliyi ilə əlaqə saxlayıb.
Nazirliyin Sanitar Karantin Mərkəzindən verilən məlumata görə, Argentina istehsalı və (və ya) Argentinadan idxal edilən “Colgate” nişanlı məhsullara gigiyenik sertifikatın verilməsi üçün Mərkəzə müraciət daxil olmayıb.
Eyni zamanda qurumdan bildirilib ki, digər ölkələrin istehsalı olan “Colgate” nişanlı məhsulların Azərbaycana idxalı ilə bağlı gigiyenik sertifikatların alınması ilə bağlı 10 may 2024-cü il tarixdən 2025-ci ilin may ayı tarixlərində Mərkəzə müraciətlər daxil olub. Mərkəz tərəfindən məhsulun laborator müayinəsi aparılıb. Müayinə nəticələri sanitariya və gigiyenik norma və tələblərə cavab verdiyi üçün məhsula gigiyenik sertifikat verilib.