İspaniyanın “Barselona” futbol klubu avqustun 10-da “Kamp Nou”ya qayıdacaq.
Ucnoqta.az xəbər verir ki, bu barədə klubun mətbuat xidmətindən məlumat verilib.
Klub ənənəvi mövsümöncəsi turnirin – "Joan Gamper Trophy"nin oyununu keçirəcək.
"Bu qayıdış klub və onun azarkeşləri üçün tarixi anı təmsil edir. İki ildən çox davam edən əsaslı təmirdən və müvəqqəti olaraq Olimpiya Stadionuna köçdükdən sonra Barselona yenidən əfsanəvi məbədində futbol həyəcanını hiss edəcək. Lakin qeyd etmək lazımdır ki, bu qayıdış stadionun müxtəlif sahələrində davam edən tikinti işləri zamanı baş verəcək. Qalan işlərə yeni üçüncü mərtəbənin tamamlanması, dam örtüyünün quraşdırılması və müxtəlif interyer məkanlarının tamamlanması, eləcə də stadionun ətrafındakı ərazinin şəhərsalma işləri daxildir”, – deyə klubdan bildirilib.
2022-ci ildən "Barselona" ev oyunlarını Olimpiya Stadionunda keçirir.
İspaniya mətbuatı yenidənqurma nəticəsində arenanın tutumunun 106 min nəfərə qədər artacağını və işlərə ən azı 1,5 milyard avro xərclənməsinin planlaşdırıldığını yazıb. Yenilənmiş "Camp Nou"nun 2024-cü ilin payızında açılması planlaşdırılırdı, lakin açılış tarixləri dəyişdirildi.
Kamp Nou 1957-ci ildə açılıb. Stadion iki Çempionlar Liqasının finalına ev sahibliyi edib – 1989 və 1999.