Son zamanlar narkotik vasitələrinin qeyri-qanuni dövriyyəsinin geniş yayılması cəmiyyət arasında böyük ajiotaja səbəb olub. Bu cür vəziyyətlərdə isə əsası olan xəbərlərlə yanaşı, insanları çaş-baş salan bəzi məlumatlar da dolaşmağa başlayır.
Ucnoqta.az xəbər verir ki, “pati” adı ilə məşhurlaşan sintetik narkotik vasitənin geniş yayıldığı bir dövrdə, bəzi mənbələr onun məktəblərdə uşaqlar arasında pulsuz paylanması barədə də versiyalar irəli sürür. Belə xəbərlər cəmiyyət arasında rezonans yaradaraq, böyük panikaya səbəb olur. Bu isə insan psixologiyasına mənfi təsir göstərərək təşviş yaradır.
Bir müddət əvvəl millət vəkili Naqif Həmzəyev mətbuata açıqlamasında isə narkotik vasitələrlə bağlı daha bir iddia ilə çıxış edib.
O, müsahibə zamanı bildirib ki, müasir dövrdə hətta yediyimiz şirniyyatların içinə belə narkotik maddələr qatılır.
“Cəmiyyətdə narkotik asılılığın yaranmasını istəyən xarici qüvvələr müxtəlif növ şirniyyatların və arıqlama dərmanlarının içərsinə narkotik maddə əlavə edib asılılıq yaradırlar".
Məsələ ilə bağlı deputat Bizim.Media-ya açıqlamasında bildirib ki, bu məsələ xüsusi olaraq Daxili İşlər Nazirliyinin nəzarəti altındadır.
“Bu məsələ barədə daha dəqiq DİN-ə və ya ekspertlərə müraciət etmək daha məntiqə uyğundur. Çünki bizim söylədiyimiz fikirlər çaşqınlıq yarada bilər.
Biz sadəcə olaraq, eşitdiklərimizə və mediada oxuduqlarımıza əsaslanaraq bu fikirləri söyləyirik. Ekspertlərin rəyinə əsasən belə bir qənaətə gəlirik. Ancaq istənilən halda bu faktlar var və bunun ətrafında da DİN araşdırmalarını apararaq cinayətkarları cəzalandırır”.
Narkomaniya üzrə ekspert Emil Maqalov isə deputatın şirniyyatlara narkotik vasitələrin qatılması fikrini absurd adlandırıb.
O, bildirib ki, heç bir alverçi 50-60 qəpiklik şirniyyata narkotik vasitə qatmaq fikrində ola bilməz.
“Narkotik elə ucuz vasitə deyil ki, onu 50-60 qəpiklik şirniyyata qatsınlar. Təsəvvür edin, 100 qram narkotik vasitə təxminən 1000 manat dəyərindədir. Həm də bildirmək istəyirəm ki, narkotik alverçilərinin bu vasitələri satmaqda qanundan başqa heç bir problemləri yoxdur. Onların müştəri axtarmağa ehtiyacları yoxdur və bu kimi iddialara sadəcə bir fərziyyədir.
Araşdırmalarım əsasında deyə bilərəm ki, şəxsən mən və mənim kimi layihə rəhbərləri bu 10 illik ekspertlik fəaliyyətim dövründə Azərbaycanda belə bir faktla rastlamamışıq”.
Söhbət əsnasında ekspert həmçinin qeyd edib ki, Daxili İşlər Nazirliyi narkotik vasitələrinin qeyri-qanuni dövriyyəsinə qarşı xüsusi mübarizə aparır.
“Hazırda DİN bütün qüvvəsi ilə bu cür hallara qarşı mübarizə aparırır. Onların bu təşəbbüsü sayəsində onlarla narkotik alverçisi ifşa olunub və Azərbaycan polisi bu ağır işlərini gecə-gündüz davam etdirirlər”.