“Region İcmalarının İnkişafına və Yoxsulluğun Azaldılmasına Dəstək” İctimai Birliyi sahibkarlığa maraq göstərən məcburi köçkünlər üçün Mingəçevir şəhərində növbəti təlim keçirib.
Ucnoqta.az xəbər verir ki, “Keçmiş məcburi köçkünlərin doğma yurda qayıdışının təşviqi və onların özünüməşğulluğuna dəstək” layihəsi çərçivəsində təşkil olunan tədbirdə Mingəçevir şəhərində məskunlaşan 30 nəfər məcburi köçkün iştirak edib.
Tədbirdə “Region İcmalarının İnkişafına və Yoxsulluğun Azaldılmasına Dəstək” İctimai Birliyinin sədri Teymur Mirzəyev əhalinin məşğulluğunun təmin edilməsi istiqamətində görülən tədbirlərdən danışıb: “Mingəçevir şəhəri respublikamızda ən çox məcburi köçkün məskunlaşan şəhərlərdən biridir. Sevindirici haldır ki, Müzəffər Ali Baş Komandan İlham Əliyevin rəhbərliyi ilə ötən il torpaqlarımız işğaldan azad olundu. Artıq Sizlər qarşıdakı illərdə öz doğma torpaqlarınıza qayıdacaqsınız. Bu gün keçirilən tədbirdə də sahibkarlığa başlamaq, özünüməşğulluğu təmin etmək üçün ilkin bilgilər öyrədiləcək”.
Daha sonra T.Mirzəyev qeyd edib ki, layihə Bərdə və Mingəçevir şəhərləri ərazisində reallaşdırılır: “Layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirilir. Görüş üçün yaradılan şəraitə görə, Qaçqınların və Məcburi Köçkünlərin İşləri üzrə Dövlət Komitəsinə, Mingəçevir şəhər İcra Hakimiyyətinə, QHT Agentliyinə, Komitənin Mingəçevir şəhər Şöbəsinə təşəkkür edirəm. İcra etdiyimiz layihənin əsas məqsədi keçmiş məcburi кöçкünləri maarifləndirmək, işğaldan azad olunan ərazilərin təbii resursları və iqtisadi imkanları ilə bağlı məlumatlandırmaq, konsultasiya xidməti göstərmək və sahibkarlığa başlamasına yardım etməklə onlara özünüməşğulluq imkanı yaratmaqdır.
Artıq layihə çərçivəsində 2 buklet çap edilib və sizlərə paylanılan həmin qovluqlara da bu bukletlərdən qoyulub. “Səmərəli bizinesin təşkili” adlı bukletdə Siz biznesə başlamaq üçün sahibkarlıq subyekti kimi onlayn qeydiyyat imkanları, kredit alınması üçün onlayn müraciət, Elektron Kənd Təsərrüfatı İnformasiya Sistemi, biznеs-plаnlаrın tərtibi ilə bağlı məlumatlar ala biləcəksiniz.
“Doğma yurda qayıdaq!” adlı bukletdə isə işğaldan azad olunan ərazilərin təbii resursları və iqtisadi imkanları ilə bağlı məlumatlar verilib”.
Daha sonra layihənin təlimçisi, “Viator” Təlim Mərkəzinin rəhbəri Azad Rəhimov iştirakçılara biznesə başlamaq üçün sahibkarlıq subyekti kimi onlayn qeydiyyat imkanları, kredit alınması üçün onlayn müraciət, Elektron Kənd Təsərrüfatı İnformasiya Sistemi, işğaldan azad olunan rayonlarımızda sahibkarlıq fəaliyyəti üçün mövcud imkanlarla bağlı məlumat verib. İştirakçılar biznes-plan hazırlamaq, kiçik biznesin təşkili və inkişaf etdirilməsi üzrə bilik və bacarıqlar öyrədilib. Məcburi köçkünlər kreativ ideyalarının reallaşdırılması üçün layihələrin yazılması və maliyyə tapılması imkanları ilə bağlı bilgiləndirilib. İşğaldan azad olunan ərazilərə qayıdacaq şəxslər həmin ərazilərin iqtisadi imkanları ilə bağlı məlumatlandırılıb”.
Daha sonra iştirakçılar biznes-plan hazırlamaqla bağlı öyrəndikləri nəzəri bilikləri təkmilləşdirmək üçün praktiki tapşırıqlar icra ediblər. Sonda iştirakçıların sualları cavablandırılıb və ehtiyacı olanlara məsləhət xidməti göstərilib.
