Çindən olan bir kişi yaddaş problemlərinə görə həkimə müraciət edib. Onun simptomları akupunktur zamanı beyin arteriyasına daxil olan iynə ilə əlaqəli olduğu ortaya çıxıb.
Ucnoqta.az Daily Mail-ə istinadən bildirir ki, kişi onunla 20 il yaşayıb.
Sıçuan əyalətindən olan 74 yaşlı xəstə yaddaş problemlərinə görə həkimlərə müraciət edib. Həkimlər adamın beynindəki arteriyaya çox kiçik iynənin ilişdiyini aşkar ediblər. Kişinin yaxınları onun 20 il əvvəl miqren xəstəliyinə görə akupunktur prosedurlarından keçdiyini xatırladıblar. Həkimlər hesab edirlər ki, bu zaman iynə gözün arxasındakı arteriyaya girmiş ola bilər.
İynəni çıxarmaq üçün həkimlər xəstənin kəllə sümüyünün bir hissəsini kəsiblər. Onu çıxarmaq üçün cərrahi mikroskop lazım olub. Əməliyyatdan 10 gün sonra kişi süni nəfəs aparatından ayrılıb və o, sağalmağa başlayıb. Lakin ümumi anesteziya zamanı yaranan fəsad səbəbindən xəstə ölümcül ağciyər infeksiyası keçirib və əməliyyatdan sonra cəmi üç həftə yaşayıb.
Həkimlərin fikrincə, bu, tibbi ədəbiyyatda təsvir olunan akupunktur iynəsi nəticəsində yaranan psevdoanevrizmanın ilk hadisəsi idi.