Amerika Nevrologiya Akademiyası tərəfindən aparılan araşdırmaya görə, yağlı və şəkərli qidalar 4 gün ərzində yaddaşınıza, diqqətinizə və əhvalınıza mənfi təsir edir.
Yoxlamalar 4 gün ərzində, xüsusən səhər yeməyində ağır şəkərli və yağlı qidalar qəbul edən insanlarda aparılıb. Nəticədə isə həmin insanların səhhətində problemlər müşahidə edilib. Oksford universitetində aparılan başqa bir araşdırmada isə tərkibində yağlılıq çox olan qidaların insanları ən ağır psixoloji vəziyyətə saldığı bildirilir.
Uzunmüddətli təcrübələr də bu faktı təsdiq edib. Alimlər bildirib ki, yağlı xörəklərə üstünlük verənlərin beyni daha tez qocalır, onlarda bir çox xəstəliklər müşahidə edilir.
Aparılan tədqiqatlarda 2 qrup insanın az yağlı və "fast food” kimi çox yağlı qidalar qəbul etməsi nəticəsində beyin funksiyalarında fərqliliklər aşkarlanıb. Çox yağlı qidalanan insanlarda kökəlməkdən əlavə, bədəndə toplanmış çox yağ səbəbindən mərkəzi sinir sistemində immuniteti qoruyan hüceyrələrdə xroniki iltihablanmaya səbəb olur.
Beyin hüceyrələrinin ölməsi ilk növbədə bir sıra əlamətlərlə özünü büruzə verir. Belə insanların diqqəti pozulur, onlar adları xatırlamaqda çətinlik çəkir, özlərini daima yuxulu hiss edirlər.
Yaxşı xəbər isə odur ki, sağlam həyat tərzinə keçib, yağlı qidalardan uzaq durduqda, beyin sürətlə özünü bərpa edir. Siz də yaddaşsızlıqdan, diqqətinizin yayınmasından şikayətçisinizsə, dərhal qidalanma tərzinizi dəyişməyiniz məsləhət görülür./medicina.az