"Biz də sizin kimi üzgünük. Qalib gəlməyi çox istəyirdik. Amma bizim üçün asan olmadı”.
Ucnoqta.az Matç.az-a istinadən xəbər verir ki, bu sözlər “Qarabağ”ın baş məşqçisi Qurban Qurbanova məxsusdu. Avropa Liqasının qrup mərhələsində “Vorskla”nı qəbul edən Azərbaycan çempionu növbəti dəfə meydanı məğlub (0:1) tərk edib.
Qarşılaşmadan sonra təşkil edilən mətbuat konfransında Qurbanov fikrini bu sözlərlə davam etdirib: “Rəqib müdafiədə çox diqqətli oynadı. Buna baxmayaraq, xeyli sayda qol epizodlarımız oldu. Qapımıza gedən bir zərbə qolla nəticələndi. Belə oyunlarda futbolçular meydançada daha çox düşünməlidilər. Çalışmalıydıq ki, hücumlarımızı düzgün quraq. Oyunun gedişində də bunlar görünürdü. Rəqibin belə müdafiə olunduğunu bilirdik. Bəzi hücumlarımız alınırdı. Biz qol şanslarından istifadə edə bilmədik, rəqib bir vəziyyət yaratdı və yararlandı. Futbolçuların üzərinə getməyə dəyməz. Nə qədər çətin olsa da, bu oyunu unudub, qarşıdakı görüşlərə hazırlaşmalıyıq. Çünki təqvimimiz sıxdı”.
– Real vəziyyət yaratsanız da, həlledici zərbəni vurmaq mümkün olmur. Ola bilərmi ki, sırf gərgin qrafikin təsiridi?
– Fərqli fikirlər söyləmək olar. Futbolçularda istər-istəməz gərginlik, yorğunluq var. 3-4 gündən bir oyun keçirmək asan deyil. Bəlkə ustalıq səviyyəs bəzi anlarda çatmır ki, son nöqtəni qoyaq. “Atletiko”nun dünənki matçına baxdım. Hesab oyuna görə deyildi. İspanların nə qədər imkanları oldu, istifadə edə bilmədilər. Həmin komanda ötən il Avropa Liqasının qalibi olub. Futbolçulara həmişə demişəm ki, daha istəkli olmalı, öz üzərimizdə çalışmalıyıq. Hər il müşahidə edirik ki, klublar yaxşı oynayır, nəticəsi olmur. “Qara zolağa” düşür deyə də bilmərik. Sadəcə, işlərini elə qururlar ki, bunlara hazır olurlar. Bizim futbolçularımız da daha çox çalışmalıdılar.
– Buraxılan qolda qapıçının, yoxsa müdafiə xəttinin səhvi çox idi?
– Qapıçını deyərdim. 30 metrlik məsafə olardı. Qapıçı bu topu tutmalı idi. İkinci hissədə əks-hücumda bizi tutsalar da, futbolçular imkan vermirdilər. Nə qədər diqqətli olsan da, rəqib 1-2 qol epizodu yaratmağa imkan tapır. Belədə də qapıçı daha çox diqqətli olmalı idi. Qol isə qapıçının səhvi idi. Amma belə səhvi ilk dəfə görmürdük.
– “Qarabağ” son illərin ən zəif avrokubok mövsümünü keçirir. Sanki “onurğa sütunu” da zəifləyib. Yay transferləri də zəif təsir bağışlayır. Razısız ki, komanda ötən illərlə müqayisədə oyun planında geriləyib?
– Onları nə qədər müdafiə etsəm də, nəticəyə görə, daha çox xoş sözlər deyə bilmərik. Amma, xüsusən də, milli üzvləri çox yorulurlar. 3 fərqli turnirdə iştirak edirlər. Heç də pis mövsüm keçirmirlər. Qara və Maksimin oyun sayı kifayət qədərdi. Bu, onların həm fiziki, həm də psixoloji hazırlıqlarının yüksək səviyyədə olmasını göstərir. Belə oyunlarda müdafiəçilərin səhvləri daha çox gözə çarpır. Amma onları qınaya bilmərəm. Desəm ki, az məşq edirik, qətiyyən belə deyil. Futbol dəyişilir. Məşqimiz olmadıqda belə teoriyalarımız, toplanışlarımız olur, rəqibin oyununu analiz edirik. Məğlub ola bilərik. Futbol elə peşədi ki, həvəsdən düşmək olmaz. Bizdən böyük klublar, futbolçular da uğursuzluq zolağına düşüb, sonra ordan çıxa biliblər. Düşünürəm ki, biz həmişə bir yerdə pis durumdan çıxmışıq. Futbolçularıma güvənirəm. Transferlərimizin oyunu bəzən alınır, bəzən alınmır. Yaratmaq istər-istəməz çətindi, nəinki dağıdıcı oyun göstərmək. Futbolçularımın yanındayam. Çalışmalıyıq daha yaxşı kollektiv göstərək.
– Halldorssonu dekabra qədər komandada görəcəyik?
– Bu günə qədər görmüsünüz. Qapıçı ən ağır mövqedi. Meydandakı 10 futbolçunu daim dəyişə bilirsən. Amma qapıçını dəyişmək əlavə itki deməkdi. Bu günə kimi bütün qapıçılara şans vermişik. Sabah Hannesi də, Şahruddini də qapıda görə bilərsiniz. Sadəcə, bu gün belə qərar vermişik.
– Qoldan sonra Emeqaranın yerinə Mahir Mədətovu meydana buraxdıq. Mahiri müdafiəçinin yerinə oyuna qoşa bilməzdiz?
– Hücumlarımız Donald və Maksim üzərində qurulmuşdu. Arxada təkcə Rəşad və Kuba, onların da önündə Qara qalırdı. Qalanları hücuma çıxmışdı. Rəqibin oyununa görə belə futbola üstünlük vermişdik.
– Əvəzetmələr ümidlərinizi doğrultmudu?
– Nəticə dəyişməyibsə, deməli, özlərini doğrultmayıblar. Amma qol epizodlarına baxsaq, heç də pis çıxış etmədilər. Sanki 3-5 metrdən top qapıdan keçmədi. Hər bir futbolçuya güvənirəm. Sonradan meydana girənlər özlərini yaxşı tərəfdən göstərməyə çalışdılar. Hər birindən razı qaldım.