“Qarabağ”ın UEFA Avropa Liqasının qrup mərhələsində rəqiblərindən olan İngiltərənin “Arsenal” futbol klubunda çıxış edən erməni futbolçu Henrix Mxitaryanın Bakıya gəlib-gəlməyəcəyi maraq doğurur.
Xarici İşlər Nazirliyinin (XİN) mətbuat xidmətinin rəhbəri Hikmət Hacıyev İngiltərənin “Arsenal” klubunun erməni futbolçusu Henrix Mxitaryanın “Qarabağ”la oyuna gəlməsinə rəsmi Bakının icazə verib-verməyəcəyi məsələsinə münasibət bildirib.
XİN sözçüsü deyib ki, Azərbaycan dünyanın idman ölkəsidir və ölkəmizdə keçirilən beynəlxalq səviyyəli idman yarışlarında Ermənistan vətəndaşlarının, o cümlədən, digər ölkələrin erməni əsilli vətəndaşlarının iştirakı dəfələrlə baş tutub.
“Azərbaycanın işğal olunmuş ərazilərinə qanunsuz səfərlər isə sırf hüquqi məsələdir”, – deyə H.Hacıyev əlavə edib.
Qeyd edək ki, Henrix Mxitaryanın Azərbaycanın işğal olunmuş ərazilərinə qanunsuz səfər edən şəxslər arasında olsa da, onun adı Azərbaycan Xarici İşlər Nazirliyinin “arzuolunmaz şəxslər siyahısı”nda yoxdur.
Azərbaycan XİN illərdir Dağlıq Qarabağa rəsmi Bakıdan icazə almadan qanunsuz səfər edən əcnəbiləri “qara siyahı”ya salır.
Bu siyahıda olan şəxslər ölkəmizdə “arzuolunmaz şəxslər” sayılırlar. Təəssüf ki, çoxsaylı xəbərdarlıqlara baxmayaraq, regiona icazəsiz səfər edənlərin sayı az deyil. XİN-in hazırki siyahısında dünyanın müxtəlif ölkələrindən 179 jurnalist, 15 bloger, 12 musiqiçi, 6 tədqiqatçı, 1 alpinist, 2 mühəndis, 9 heykəltəraş, 12 fotoqraf olmaqla 710 nəfər yer alıb.
“Qara siyahı”ya 8 nəfər Türkiyə, 172 nəfər Rusiya, 42 nəfər Fransa vətəndaşının da adı düşüb.
Xarici İşlər Nazirliyi Azərbaycanın işğal altında olan Dağlıq Qarabağ bölgəsinə qanunsuz səfər etmək istəyən şəxslərlə bağlı mütəmadi olaraq xəbərdarlıqlar edir.modern.az