ABŞ və İsrailin İrana qarşı hərbi əməliyyatı qlobal iqtisadi artımı yavaşlatacaq və inflyasiyanı sürətləndirəcək.
Ucnoqta.az xəbər verir ki, bu barədə Dünya Bankının (DB) prezidenti Ajay Banqa Vaşinqtonda yerləşən Atlantik Şurasında çıxış edərkən bildirib.
Qlobal iqtisadiyyat üçün nəticələrdən danışan Banqa inflyasiyanın müəyyən qədər artması və artımın müəyyən qədər azalmasından bəhs edib.
"Əgər son münaqişədən əvvəl qlobal ÜDM artımının 2,8-3,0% olacağını desək, onda baza ssenarisi üzrə bu, ehtimal ki, 0,3-0,4 faiz bəndi azalacaq. Daha uzun böhran nəzərdə tutan daha mürəkkəb [ssenari] üzrə isə 1 faiz bəndi və ya daha çox azalacaq", – deyə o qeyd edib.
"Bu, orada yaşayan insanlara təsir edir. Bu, Asiyada, Afrikada, idxal olunan neft, gübrə, kükürd, helium və s.-dən asılı olan insanlara təsir edir. Bəzi cəhətdən ən böyük təzyiq inkişaf etməkdə olan bazarlara düşür", – Dünya Bankının prezidenti əlavə edib.
Banqa qeyd edib ki, bank bəzi ölkələrə maliyyə yardımı göstərə bilər, lakin hansı ölkələrə maliyyə yardımı göstərəcəyini dəqiqləşdirməyib.
Prezidentin sözlərinə görə, bu ölkələr əvvəlcə 20 milyard ilə 25 milyard dollar arasında ala bilərlər. Növbəti altı ay ərzində bu məbləğ 60-70 milyard dollara qədər artırıla bilər.