İlahiyyatçı Tural İrfan “Azercell” abonenti olmaqdan imtina edib.
Ucnoqta.az Tribuna-ya istinadla bildirir ki, dini mövzular üzrə ekspert 25 ildən artıq “Azercell” nömrə istifadə etdiyini açıqlayıb: “Dünən 5 manat yükləmişəm, heç bir kreditin olmadığı, heç yerə də danışmadığım halda bayaq baxıram ki, 1 manat 80 qəpik qalıb. 2002 xidmətinə zəng etdim, operator bildirdi ki, məcburi tarifə qoşmuşuq bütün abonentləri. Əvvəllər aylıq 2 manat olan vergi, indi 3 manat 80 qəpik olub.
Yəni belə çıxır ki, qısa müddət ərzində yenidən ikiqat qaldırıblar tarifi. Məcbur oldum 25 il mənimlə yoldaş olan sim nömrəni rədd edim. Belə şirkət olar? Belə xidmət olar? Bu, əhalini, abonentləri istismardır. Etibarından sui-istifadə edərək qanını sormaqdır. 25 ildir bütün qohum – əqraba, dost – yoldaş, mətbuat mənim bu nömrəmi bilir. İndi niyə məcbur edirsiniz ki, dəyişim?”
Onun fikrincə, soyğunçuluq bir yana, adamın qüruruna, şəxsiyyətinə toxunurlar, işini dolaşdırırlar:”Allah da sizin işinizi dolaşdırar, inşallah! Pensiyaçı, şair, çoban, fəhlə tutalım inanıb, etibar edib 20 ildir sim nömrə istifadə edib. İndi ya hər ay soyulmalıdır, ya da nömrəni dəyişməlidir?
Ayıbdır vallah. Bu qədər də ağ eləmək olmaz. Şəxsən mənim hər ay 4 manat “Azərcell”ə yedirməyə imkanım yoxdur”.