"Naxçıvan Muxtar Respublikası Səhiyyə Nazirliyinin tabeliyində olan publik hüquqi şəxslərin işçilərinə stimullaşdırıcı əlavənin ödənilməsi haqqında" qərar ləğv olunub.
Ucnoqta.az iqtisadiyyat.az-a istinadən xəbər verir ki, bununla bağlı muxtar respublikanın Baş naziri Ceyhun Cəlilov qərar imzalayıb.
Ləğv olunan 151 nömrəli qərar 2019-cu ilin oktyabrın 16-da muxtar respublikanın o zamankı Baş naziri Əlövsət Baxşıyev tərəfindən imzalanıb.
Qeyd edək ki, həmin stimullaşdırıcı əlavələr həkimləri həvəsləndirmək məqsədi daşıyıb. İcbari tibbi sığortanın tətbiqindən sonra isə yeni yanaşmaya zərurət yaranıb. Belə ki, 2023-cü ildən etibarən Naxçıvan Muxtar Respublikası Səhiyyə Nazirliyinin tabeliyində tibbi sığorta əsasında fəaliyyət göstərən, tibb müəssisələrində çalışan səhiyyə işçilərinin əməyinin ödənilməsi Qaydası təsdiq olunub.
Həkimlərin vəzifə öhdəliklərinin xarakterindən və müvafiq həkim ixtisası üzrə pasiyent müraciətinin qeydiyyatı xüsusiyyətlərindən asılı olaraq həkimlərə həvəsləndirici əlavələr, sabit aylıq həvəsləndirici əlavələr və işin nəticələrinə görə aylıq həvəsləndirici əlavələr şəklində ayrı-ayrı hesablanır. Beləliklə, səhiyyə işçilərinin, xüsusilə həkimlərin əməkhaqqıları bir neçə mənbədən formalaşdırılır. Həkimlərə verilən işin nəticəsinə görə həvəsləndirici əlavələr göstərilən tibbi xidmətin tarifinə görə dəyişir. Tibbi xidmətlərin tarifləri Xidmətlər Zərfi ilə tənzimlənir. Bundan əlavə, həkim cərrahi fəaliyyətlə məşğul olduğu halda icra edilən əməliyyat və tibbi prosedurlara görə də Xidmətlər Zərfindəki tariflərə uyğun olaraq əlavələr alır. O vaxtdan yeni qaydalara əsasən tarif cədvəlinə və veriləcək əlavələrə görə həkimlər üçün ən aşağı əməkhaqqı 1200 manat məbləğində təyin olunub.