Deputat Aqil Abbasın Milli Məclisin fevralın 3-də keçirilən plenar iclasında etdiyi çıxış müzakirələrə səbəb olub. Onun işlətdiyi bəzi ifadələr diqqət çəkib. Belə ki, deputat çıxışı zamanı işlətdiyi “Arvad boğuşması” sözünə görə Milli Məclisin sədri Sahibə Qafarovanın iradına tuş gəlib.
Sitat: “Mənfur Sovet dövründə mən qəzetdə işləyəndə adicə həkim haqda xoş söz demək olmazdı. Bu gün televiziyalarda əsas gəlir gətirən arvad boğuşması və həkimlərin, dərmanların reklamıdır”.
Milli Məclisin spikeri Sahibə Qafarova Aqil Abbasa irad bildirərək, “Arvad boğuşması, arvad davası, bu, parlament sözüdür?” – deyib.
Aqil Abbas spikerin haqlı irad bildirdiyini qeyd edib:
“Əslində, Sahibə xanım düz deyir. İradı normal qəbul edirəm. Doğrudan da o söz parlamentdə ifadə edilməli deyildi. Sadəcə, çıxış zamanı fikrimi yazıçı kimi dilə gətirmişəm. Mənim o sözümü təhqir bilənlərin hamısından üzr istəyirəm”.
Xatırladaq ki, arvad ifadəsi vaxtaşırı narazılığa, tənqidə səbəb olur. Baxmayaraq ki, rəsmi nikaha girərkən cütlüklər ər-arvad adlandırılır. Maraqlıdır ki, ər sözü normal qəbul edilsə də, arvad ifadəsi qıcıq yaradır.///qlobalinfo