Google tərtibatçıları "WhatsApp"da ciddi səhvi aradan qaldırıblar
Ucnoqta.az xarici mətbuata istinadən xəbər verir ki, “Android” əməliyyat sisteminə cavabdeh olan “Google” tərtibatçıları istifadə edilmədikdə mikrofonun aktivliyinin göstəricisinə gətirib çıxaran səhvin olduğunu təsdiqləyiblər. Əvvəllər bu xətaya görə istifadəçilər “WhatsApp” messencerindən istifadə edərək izlənildiklərini düşünürdülər.
“WhatsApp” tərtibatçıları da öz növbəsində bildiriblər ki, problem “Android” daxilindəki xəta ilə bağlıdır və əslində heç kim istifadəçilərə casusluq etmir – mikrofonun göstəricisi onu aktiv kimi göstərsə də, həmin vaxt messencerdən heç bir qeyd aparılmayıb.
İndi, Android tərtibatçılarına görə, problem aradan qaldırılıb. Onlar həmçinin WhatsApp istifadəçilərini messencer proqramını yeniləməyə çağırıblar.
İlk dəfə bu xəta "WhatsApp"ın ona casusluq etməsindən şikayət edən "Twitter" istifadəçisinin mesajından məlum olub – guya messencer istifadəçi yatarkən və ondan istifadə etmədikdə mikrofonu işə salıb. Tezliklə İlon Musk da tənqidlərə qoşularaq yazmışdı: "WhatsApp-a etibar etmək olmaz".