28 dekabr 2021-ci il tarixdə Azərbaycan Respublikasının Gənclər Fondunun maliyyə dəstəyi ilə Biləsuvar Yeniyetmə və Gəncləri İctimai Birliyinin "Karyeranı qur" layihəsi çərçivəsində Cəlilabad Tibb Kollecində gənclərlə dördüncü maarifləndirmə tədbiri keçirilib.
Ucnoqta.az xəbər verir ki, tədbirdə "Biləsuvar Yeniyetmə və Gəncləri" İctimai Birliyinin idarə heyətinin üzvü və layihə rəhbəri Elnur Hüseynli, layihənin təlimçisi Bəhruz Nəbili və rayon gəncləri iştirak edib.
Əvvəlcə layihə rəhbəri Elnur Hüseynli çıxış edərək təşkilatın fəaliyyəti və layihə barədə ətraflı məlumat verib. E.Hüseynli öz çıxışında layihənin karyera planlaşdırılması və inkişafı üçün və gənclərin gələcək peşəkar kimi formalaşmasında əhəmiyyətli olduğunu bildirib. O, layihənin gənclər üçün fərqli perspektivlər və yeni imkanlar yaratdığını vurğulayıb:
"Bu gün dördüncü marifləndirmə tədbirimizi həyata keçirməklə layihənin Biləsuvar və Cəlilabad rayonlarında olan təlimlərini yekunlaşdırmaqla ümumilikdə 100-dən çox gəncin təlimlərdə fəal iştirakını təmin etmiş olacağıq".
Daha sonra təlimçi B.Nəbilinin iştirakı ilə gənclər mövzu ətrafında müzakirələrdə iştirak edib. İştirakçılar üçün könüllülük fəaliyyəti, uğurlu könüllü, könüllülükdən karyeraya, karyera inkişafı sahələri üzrə gənclərin maarifləndirilməsi istiqamətində söhbət aparılıb. Təlimdən faydalanan gənclər öz şəxsi inkişaf yollarını müəyyən etmək, özünün və peşə ilə bağlı ehtiyaclarını müəyyən etmək, şəxsi inkişaf istiqamətlərini analiz etməklə özünə uyğun karyera qurmaq, praktiki tapşırıqlar vasitəsilə məqsədə gedən yolu müəyyənləşdirmək üçün bilik və bacarıqlar əldə edib.
Tədbirlər zamanı mövzu ilə bağlı Gənclər Fondunun maliyyə dəstəyi ilə hazırlanmış çap materialları gənclər arasında paylanılıb. Sonda fərqlənən tədbir iştirakçıları sertifikat və hədiyyələrlə mükafatlandırılıb.