“Bu, Azərbaycan futbol ailəsinin mükafatıdır”.
Bunu AFFA-nın icraçı vitse-prezidenti Elxan Məmmədov İdman Araşdırmalar Mərkəzinin “İlin Qalibləri-2021” layihəsi üzrə qaliblərin mükafatlandırılması mərasimində deyib.
AVRO-2020-nin Bakıda keçirilmiş dörd oyunu Azərbaycanda ilin idman yarışı seçilib. Məmmədov bildirib ki, ilk mərhələdə yarış 13 şəhərdə təşkil olunmalı idi: “İki şəhər bu hüquqdan məhrum oldu. Əslində Avropa çempionatı çox gözəl təşkil edildi. Böyük futbol bayramının şahidi olduq. Bakıda tək qrup mərhələsi deyil, 1/4 final oyunu da baş tutdu. Dövlət qurumlarına təşəkkür edirəm. Dövlətimiz həmişə yanımızda olub”.
AFFA rəsmisi Avropa Konfrans Liqasının pley-offuna vəsiqə qazanmış “Qarabağ”ı təbrik edib: “Azərbaycan futbolunda tarix yazırlar. İnanıram ki, yeni rekordlara imza atılacaq. Məndən əvvəl mükafatlandırılmış Milli Paralimpiya Komitəsinin prezidenti İlqar Rəhimova müraciət edib demək istəyirəm ki, o müzəffər zəfər bayrağını müvəqqəti olaraq bizə verəsiniz. Bəlkə yığmamız uğur qazana bildi (gülür)”.///oxu.az