Xəzər rayonu Binə qəsəbəsi, Südçülük Sovxozu adlanan yaşayış massivində su problemi davam edir.
Bu problemlə bağlı Ucnoqta.az-a qəsəbə sakinləri müraciət edib. Sakinlərin dediyinə görə, bir neçə il öncə qəsəbəyə su təhcizatının yaxşılaşdırılması üçün su xətti çəkildi: "Bəzi evlər su ilə təmin olunsa da əksəriyyət evlər su ilə təmin olunmadı. Qəsəbədə xeyli sayda sakinin məskunlaşdığı ərazilərdə su yoxdur. Əhali suya olan tələbatını həyətlərdə quyular qazmaqla və su maşınlarından su almaqla ödəyirlər. Ancaq bu quyulardan çıxan su duzlu olduğundan ondan ancaq məişət məqsədilə istifadə edilir. Su duzlu olduğundan bir sıra hallarda ağaclar quruyur. Sakinlər deyirlər ki, quyu suları ilə çimmək belə mümkün deyil. Su duzlu olduğundan çiməndən sonra bədəndə qaşınma yaranır, xəstəliklər yaranır. Uşaqların bu sudan istifadəsi isə çox təhlükəli xəstəliklərin yaranmasına səbəb olur. Bəzi sakinlər isə su tələbatını su maşınları vasitəsilə təmin edir. Bu da çox baha başa gəlir. Yayda vəziyyət daha da acınacaqlı olur."
Qəsəbə sakinlərinin sözlərinə görə, suyun tonunu 6 manata alırıq: "Sanki "Azərsu" qəsdən əhalini su ilə təmin etmir ki, suyu maşınlarla alaq. Amma, hər evə sayğac qoyulsa istifadə etdiyimiz suyun pulu büdcəyə gedəcək. Şikayətimizlə bağlı dəfələrlə "Azərsu"da da olmuşuq. Sonuncu dəfə iki il öncə yaxın zamanda əraziyə su çəkiləcəyi bildirilsə də, hələ də konkret nəticə yoxdur. Müraciətimiz TV kanlda işıqlandırılsa da, "Azərsu" sözçüsü ərazidə mərkəzləşmiş su xəttinin olmadığını bildirib. Xatırladaq ki, əraziyə su xətti 3-4 il əvvəl çəkilib."
Emin