Azərbaycan dilinin 7-ci dəfə çap olunacaq yeni orfoqrafiya lüğətinə iki mindən çox yeni söz əlavə edilib.
AMEA-nın Nəsimi adına Dilçilik İnstitutunun Tətbiqi dilçilik şöbəsinin müdiri, filologiya elmləri doktoru professor İsmayıl Məmmədli bildirib ki, lüğətdə ümumilikdə yüz mindən çox sözün olması planlaşdırılır: "Azərbaycan dilinin yeni orfoqrafiya lüğəti artıq çapa göndərilib. Dilimizin zənginləşməsi üçün daim islahatlar aparılır. 1929-cu ildən 2013-cü ilə qədər sözügedən müəssisə tərəfindən 6 dəfə Orfoqrafiya lüğəti yenilənərək nəşr edilib".
İ.Məmmədli deyib ki, lüğət müasir və qədim Azərbaycan sözlərinin, müxtəlif sahələrdə işləklik qazanmış terminlərin düzgün seçimi prinsipi üzrə, eyni zamanda Nazirlər Kabinetinin 2019-cu il 16 aprel tarixli Qərarı ilə təsdiq olunmuş "Azərbaycan dilinin Orfoqrafiya Normaları”na uyğun tərtib edilib.