Nərimanov rayonunda yerləşən 43 saylı orta məktəbdə valideynlərdən təmir məqsədilə pul yığılması ilə bağlı sosial şəbəkələrdə yayılan iddialar cəmiyyətdə ciddi narazılıq doğurub.
Məsələ ilə əlaqədar Modern.az müvafiq məktəb-liseyi və Bakı Şəhər Təhsil İdarəsi (BŞTİ) ilə əlaqə saxlayıb.
Məktəb-lisey kompleksinin məlumatına əsasən təhsil müəssisəsində yeni tədris ili öncəsi valideynlərlə ənənəvi görüş keçirilib. Əvvəlki illərdəki ənənəyə uyğun olaraq tədris korpusu dəyişən VI və VII sinif şagirdlərinin valideynləri övladlarının təhsil alacağı korpusla tanış olublar. Valideynlər həmin tədris korpusunun durumu ilə bağlı rəylərini bildiriblər.
Məktəb rəhbərliyi tərəfindən həmin valideynlərə bildirilib ki, bu korpusun təmiri üçün aidiyyəti üzrə müraciət olunub.
Bununla bağlı valideynlərdən vəsait tələb olunmasına dair iddialar tamamilə əsassızdır.
Pedaqoji kollektivin əsas məqsədi yeni dərs ilində məktəbimizdə daha səmərəli təhsil mühitinin formalaşmasına və qarşılıqlı etimada əsaslanan münasibətlərin yaradılmasına nail olmaqdan ibarətdir.
Qeyd edək ki, Bakı şəhəri Məktəb-Lisey Kompleksinin fəaliyyəti Bakı Şəhəri üzrə Təhsil İdarəsi tərəfindən nəzarətdə saxlanılır.
"Yeni dərs ilinə hazırlıq çərçivəsində təhsil müəssisələrinin infrastruktur və digər istiqamətlər üzrə ehtiyacları müəyyənləşdirilib və müvafiq tədbirlərin görülməsi məsələsinə baxılır"- deyə BŞTİ-dən sorğumuza cavab olaraq bildirilib.