Türkiyə dövlətinə qarşı əməl törətməkdə ittiham olunaraq ilyarım həbsxanada saxlanılan Adnan Oktarın tərəfdarlarından 91-i ev dustaqlığına buraxılıb. Onlardan 77-si qadındır.
Dünən Türkiyə mətbuatı həbsxanadan çıxan qadınların evlərinə yox, Adnan Oktarın villalarına, otellərinə üz tutduğunu yazmışdı. Çıxanlardan Oktarın sağ əli sayılan “Bacı” ləqəbli Tülay Kumaşçı Dəmirörən Xəbər Agentliyinə (DHA) müsahibəsində medianın həqiqəti yazmadığını bildirib.
“Deyirlər ki, qızların bir çoxu otelə gedib. Belə bir şey yoxdur. Hər kəs evinə getdi. Əksinə, ailələrdən böyük dəstək var. Barmaqla sayılacaq qədər ailə təsirə düşüb. Biz 3-4 yoldaş birlikdə qalırıq. Amma ailəmizlə də görüşürük. Analarımız lazım olan şeyləri alıb gətirir. Bizə çox bağlıdırlar. Onları çox sevirik”, – Tülay Kumaşçı deyib.
“Bacı” dövlətə qarşı heç nə planlamadıqlarını bildirir. O, indi evində yaşadığını və özünü azad hiss etdiyini söyləyib. Kumaşçı həbsxanada yaxşı münasibət gördüklərini deyib: “Düzdür, cinayət törətmiş adamlarla qaldıq. Narkotik maddə satanlar vardı. Rumın yoldaşlarla qaldıq. Gerçəkdən bir imtahan keçdik. Bu da bizə bir təcrübə oldu”./bizimyol.info