“MTN işi” məhkəməsində general Elçin Quliyevlə zərərçəkmiş arasında mübahisə yaranıb

Bu gün Bakı Hərbi Məhkəməsində ləğv edilmiş Milli Təhlükəsizlik Nazirliyinin Antiterror Mərkəzinin rəisi, general-mayor Elçin Quliyev və Antiterror Mərkəzinin əməkdaşı, polkovnik Azər Mehdiyevin cinayət işi üzrə məhkəmə prosesi davam etdirilib. APA-nın məlumatına görə, hakim Elbəyi Allahverdiyevin sədrliyi ilə keçirilən prosesdə Xəzər rayon İcra Hakimiyyəti başçısının 1-ci müavini Ələkbər Heydərovun epizodu üzrə ləğv edilmiş MTN-in Antiterror mərkəzinin sabiq əməkdaşı Fuad Fətəliyev ifadə verib. O, deyib ki, bütün qərarları mərhum MTN polkovniki İlqar Əliyev qəbul edib: "Mən sadəcə, əmrləri yerinə yetirmişəm. Ələkbər Heydərovun saxta sənədlər verməsi ilə bağlı həbs olunması əməliyyatının istintaqını aparmışam. Mən yalnız Ələkbər Heydərovdan izahat almışam və onu sonra buraxmışıq. Ancaq sonradan Ələkbər Heydərovdan İlqar Əliyevin pul aldığını eşitmişəm. Ancaq bu barədə dəqiq məlumatım yoxdur".
Zərərçəkmiş Ə. Əliyev isə buna etiraz edib və şahidi tanımadığını, ondan bu şəxsin izahat almadığını deyib.
Bu zaman təqsirləndirilən E. Quliyev zərərçəkmişə etiraz edərək, Ə. Heydərovdan 300 min manat alınması ilə bağlı söhbətlərin İlqar Əliyev tərəfindən yayılmasının inandırıcı olmadığını deyib: "Təsəvvür edin, İlqar Əliyev pul alıb. Gedib kiməsə deməli idi ki, mən 300 min manat pul almışam? Axı bu məntiqsizdir. Digər tərəfdən zərərçəkmişdən pulu mən almamışam. Mənə bu epizod üzrə niyə ittiham verilib?".
Zərərçəkmiş Ə. Heydərov da E. Quliyev adını çəkmədiyini deyib.
E. Quliyev isə cavabında zərərçəkmişə "bəs onda mən niyə burda oturmuşam, təqsirim nədir?" sualını verib.
Zərərçəkmiş isə E. Quliyevə pul vermədiyini deyib və bu zaman onlar arasında mübahisə yaranıb.
Ə. Heydərov daha sonra bunları deyib: “Mən bilirəm ki, orda bütün işlərə siz rəhbərlik etmisiz. Pul alınması da sizin rəhbərliyiniz vasitəsilə həyata keçirilib. Sizin xəbəriniz olub. Mənim həbsim barədə tapşırığı da siz vermisiniz”.
Hakim prosesə müdaxilə etdiyinə görə E. Quliyevə xəbərdarlıq edib.
Sonra şahid qismində zərərçəkmiş Ələsgər Əliyevin epizodu üzrə şahid Aydın Allahverdiyev ifadə verib. O deyib ki, ona məxsus torpaq sahəsi də Heydər adlı şəxs vasitəsilə satılıb. O, ifadəsində zərərçəkmiş Ə. Əliyevin MTN əməkdaşları tərəfindən təzyiqə məruz qaldığı barədə məlumatının olduğunu deyib.
Təqsirləndirilən Elçin Quliyev yenə də şahidin ifadəsinə etiraz edərək "Sizin başınıza tapança dirəyən olub?” deyə sualla müraciət edib: "Əslində zərərçəkmiş bizik. Ələsgər saxta sənədlə bizə torpaq sataraq 80 min manata yaxın pulumuzu ələ keçirib. Ona demişik ki, pulu qaytarmasan səni tutduracağıq. Bəs siz bizim yerimizdə olsanız, sizə qarşı dələduzluq edən şəxs haqqında şikayət etməzdiniz? Nə olsun ki, belə vəzifəmiz var. Bu adam bizə qarşı konkret dələduzluq edib. Biz pulumuzu tələb etmişik və yerimizə kim olsaydı, belə edərdi".
Proses avqustun 4-də davam etdiriləcək.
Qeyd edək ki, Elçin Quliyev MTN-in Antiterror Mərkəzinin rəisi olub. Daha sonra MTN-lə bağlı aparılan istintaq zamanı o tutduğu vəzifədən azad edilərək nazirliyin Heydər Əliyev adına Akademiyasının kafedra rəisi təyin edilib. Ondan sonra isə şübhəli şəxs qismində saxlanılaraq həbs edilib.
Elçin Quliyevə Cinayət Məcəlləsinin 145.3-cü (qanunsuz azadlıqdan məhrum etməklə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olma), 181.3.1-ci (mütəşəkkil dəstə tərəfindən quldurluq törətmək), 181.3.2-ci (külli miqdarda əmlak əldə etmək məqsədi ilə quldurluq törətmək), 182.3.1-ci (mütəşəkkil dəstə tərəfindən hədə-qorxu yolu ilə tələb etmə), 182.3.2-ci (külli miqdarda əmlak əldə etmək məqsədi ilə hədə-qorxu yolu ilə tələb etmə), 302.2-ci (əməliyyat-axtarış fəaliyyəti haqqında qanunvericiliyi pozma, eyni əməllər informasiyanın gizli yolla götürülməsi üçün nəzərdə tutulan xüsusi texniki vasitələrdən istifadə edilməklə törədildikdə), 308.2-ci (vəzifə səlahiyyətlərindən sui-istifadə etmək), 309.2-ci (vəzifə səlahiyyətlərini aşmaqla, zor tətbiq etməklə və ya zor tətbiq etmə hədəsi ilə törədildikdə, yaxud silah və digər xüsusi vasitələrdən istifadə etməklə törədildikdə və ya ağır nəticələrə səbəb olma), 311.3.1-ci (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma), 311.3.2-ci (təkrar rüşvət alma), 311.3.3-cü (külli miqdarda rüşvət alma) maddələri ilə ittiham elan olunub.