Bakının Xəqani Rüstəmov küçəsinin Nobel prospekti və Süleyman Vəzirov küçəsi ilə kəsişməsində yeni yeraltı piyada keçidlərinin tikintisi nəzərdə tutulub. Bu barədə Ucnoqta.az-a "Azəravtoyol" ASC-dən bildirilib.
Məlumata görə, bu işlər “Xəqani Rüstəmov küçəsi və "Ağ şəhər" avtomobil yollarının infrastruktur layihəsi” çərçivəsində görüləcək.
Qeyd edəki, layihə üzrə Xəqani Rüstəmov və Süleyman Vəzirov küçələri də daxil olmaqla ümumi uzunluğu 22,3 km, eni isə 16 m-dən 47 m-ə kimi dəyişən 63 çoxsaylı kəsişən yollar yerləşir. Yollar hər birinin eni 3,5 m olmaqla 2,4 və 6 hərəkət zolağından ibarətdir, piyada səkilərinin eni isə 3, 6, 10 m olmaqla müxtəlif ölçüdədir.
Ərazidə mazutlu və texnogen mənşəli yararsız qrunt 2 m-ə yaxın dərinlikdə qazılaraq çıxarılıb və ərazidən uzaqlaşdırılıb. Əvəzində isə yararlı karxana materialından yol geyiminin əsası inşa olunur. Ümumilikdə 1 mln. 200 min kub.m yararsız material qazılaraq ərazidən uzaqlaşdırılıb və əvəzinə 1 mln. kub. m yararlı karxana materialından geri dolğu işləri görülüb. Bundan əlavə, 5 min kub.m miqdarında daş və demir-beton tikililər sökülərək, həmçinin ərazinin bəzi hissələrində rast gəlinən 95 min kub.m qaya qruntu xüsusi texniklarla dağıdılaraq ərazidən uzaqlaşdırılıb.
Eyni zamanda bəzi yollarda yol geyimin alt hissəsində 70 min kub.m hamarlayıcı lay, 15 min kub.m əsasın üst layı inşa edilib, 12 min poqon metr mərmər-qranit səki daşı və 8 500 kub. m piyada zolağında tamet daşları düzülüb. Yolların kənarında uzunluğu 500 m-ə yaxın, hündürlüyü 10-15 m arası dəyişən istinad divarı inşa olunub.
Ümumilikdə Xəqani Rüstəmov küçəsi də daxil olmaqla 80% yollarda əsasın tikinti işləri bitmiş sayılır. Bütün yollarda zəruri yeraltı kommunikasiya xətlərinin çəkilişi işləri də aparılıb.
Bakının iki əsas prospektini – Babək və Nobel prospektlərini birləşdirəcək Xəqani Rüstəmov küçəsinin 3 gediş və 3 gəliş olmaqla, 6 hərəkət zolaqlı olması nəzərdə tutulub. Küçənin eni 45 m, ayrıcı zolağın eni 3 m, səkinin eninin isə bəzi yerlərdə 4,5 m olması nəzərdə tutulub.
Xəqani Rüstəmov küçəsi qərbdən paytaxtın "Yaşıl ada" adlanan müasir mərkəzi ərazisini əhatə edir. Bu küçənin abadlaşdırılması ərazinin ilk sakinlərinin rahat yaşamasına yardım edəcək, həmçinin onların "Bakı Ağ Şəhər"in daxilində və xaricində ayrı-ayrı obyektlərə asan çıxışını təmin edəcək.
"Ağ şəhər" avtomobil yollarının infrastruktur layihəsi” çərçivəsində Xəqani Rüstəmov küçəsi ilə Nobel prospektinin və Süleyman Vəzirov küçəsinin kəsişmələrində yeraltı piyada keçidlərinin tikintisi işləri də aparılır. 2 ədəd keçidin hər birinin uzunluğu 280 m, qalereyasının eni 8 m, hündürlüyü isə 3,2 metrdir. Keçidlər 16 ədəd eskalatorla təmin olunacaq.
Xəqani Rüstəmov küçəsi ilə Nobel prospekti kəsişməsində layihələndirilən yeraltı piyada keçidində 220 m uzunluğunda qalereyanın tikintisi yekunlaşıb. Hazırda keçiddə üzlənmə işləri davam etdirilir. Ümumilkdə keçidin inşası zamanı uzunluğu 14 m olan 354 ədəd demir beton svay, 370 ədəd beton svay, 440 m uzunluğunda dəmir-beton rostverq, 115 ədəd dəmir-beton tir inşa edilib, 2 qat ruburoid materialı ilə izolyasiya olunub, 2 500 kv.m olan mərmər-qranit işlərindən xeyli hissəsi görülüb və 8 ədəd çöl şəraitində quraşdırılan eskalator sifarış olunub.
Xəqani Rüstəmov küçəsi İlə Süleyman Vəzirov küçəsinin kəsişməsində layihələndirən yeraltı piyada keçidində isə uzunluğu 14 m olan 354 ədəd dəmir-beton svaydan 300 ədədi, 370 ədəd beton svaydan 270 ədədi inşa olunub, digər tikinti işləri davam etdirilir.\\