Bakıda “Qanlı Göl” adlanan ərazidə yeni istirahət sağlamlıq mərkəzi və çoxmənzilli binalar inşa olunacaq. Bunu APA-ya Yasamal rayon İcra Hakimiyyəti başçısının I müavini, Köçürmə üzrə işçi komissiyanın sədri Səməd İslamov bildirib. S. İslamov deyib ki, ümumilikdə “Qanlı Göl” ərazisi 219 hektar təşkil edir. “Qanlı Göl” ün cənub və cənub – qərb hissəsindəki ərazidə hələ 1996-cı ildə məcburi köçkün ailələri məskunlaşıb. 2014- cü ilin sonlarında Qaçqınların və Məcburi Köçkünlərin İşləri üzrə Dövlət Komitəsi və Yasamal rayon İcra Hakimiyyəti tərəfindən Badamdar istiqamətində olan ərazidə məskunlaşmış 300-ə yaxın məcburi köçkün ailələrinin köçürülməsi təmin edilib. Bu ailələrin hamısı şəhərin müxtəlif yerlərində rahat şəraitli mənzillərlə tam təmin olunub: “Bakı şəhərinin Baş Planının icrasının təmin edilməsi ilə əlaqədar qeyd edilən ərazi də daxil olmaqla gələcəkdə burada yeni istirahət sağlamlıq kompleksi inşa olunacaq, möhtəşəm park salınacaq. İnsanların sağlamlığını qorumaq, həmçinin, ətraf mühitin mühafizəsini, ekoloji vəziyyətinin yaxşılaşdırılmasını və gələcəkdə ondan səmərəli istifadə olunmasını təmin etmək, qorunub saxlanılmasına nəzarəti həyata keçirmək məqsədilə yeni, müasir standartalara uyğun salınacaq istirahət sağlamlıq kompleksi respublikamızda aparılan yenidənqurma işlərinin əhəmiyyətli layihələrindən biri olacaq. Layihə Avropanın tanınmış memarları tərəfindən hazırlanıb. “Qanlı Göl” adlanan ərazinin digər, şimal və şimal- qərb hissəsində, Yasamal rayonu, Xarici Dairəvi Avtomobil yolunun kənarında yerləşən ərazi isə vətəndaşların mənzil-məişət şəraitinin yaxşılaşdırılması məqsədilə Azərbaycan Respublikası Prezidenti yanında Mənzil İnşaatı Dövlət Agentliyi (MİDA) tərəfindən güzəştli mənzillərin inşası üçün seçilib. Vətəndaşların əlverişli şərtlərlə əldə edəcəyi mənzillərin yerləşəcəyi ərazinin sahəsi 11,6 hektardır”.
S. İslamov qeyd edib ki, ilkin hesablamalara görə, salınacaq şəhərcikdə 2 minə yaxın mənzil tikiləcək: “Şəhərin ekoloji cəhətdən təmiz, sağlam və əlverişli hissəsində yerləşən ərazinin yaxınlığında 5 hektara yaxın yaşıllıq zonasının olması isə onun ekoloji durumunu daha da yaxşılaşdırır. İnsanların çox vaxt itirmədən iş yerlərinə çatması məqsədilə yeni şəhərciyin nəqliyyat sisteminin paytaxtın mövcud nəqliyyat şəbəkəsi ilə inteqrasiyası təmin ediləcək. Şəhərcikdə çoxmənzilli binalarla yanaşı, insanların rahat yaşayışı üçün hər cür şəraitin yaradılması, normalara uyğun olaraq həyətlərin, yaşıllıq zolaqlarının, uşaq meydançalarının, vətəndaşların zəruri ehtiyaclarının ödənilməsini təmin etmək üçün məktəb, uşaq bağçası, məişət və xidmət obyektləri, həmçinin digər müvafiq sosial infrastrukturun yaradılması nəzərdə tutulur”.
S. İslamov nəzərə çatdırıb ki, “Qanlı Göl” adlanan ərazinin şimal və şimal-qərb hissəsində yerləşən 11,6 hektar ərazidə hal-hazırki zamanda MİDA tərəfindən inşa olunacaq çoxmənzilli binaların tikintisinə heç bir maneə yoxdur. Hazırki vəziyyətdə orada hər hansı bir yaşayış sahələrinin söküntüsünə ehtiyac yoxdur: “Lakin gələcəkdə növbəti mərhələlərdə layihənin daha geniş ərazidə tətbiqi üçün zərurət yarandıqda bu sahələrin də boşaldılması təmin ediləcək. Ərazidə yerləşən yaşayış evlərinin söküntüsü zamanı uzun illər həmin evlərdə yaşadıqlarını nəzərə alaraq, sənədsiz evlər də daxil olmaqla sahəsinə görə mənzil sahiblərinə dövlət tərəfindən kompensasiyalar ödəniləcək. Ancaq, həmin ərazidə yaşayan hər bir vətəndaş bunu bilməlidir ki, təsərrüfat məqsədilə qanunsuz olaraq zəbt olunmuş və çəpərlənmiş torpaq sahələrinə görə heç bir kompensasiya ödənilməyəcək”.